تناتيش

مش بيلعبوا أتارى!
الاشتباكات التى تدور فى سيناء بين قواتنا المسلحة الباسلة والإرهابيين بالأسلحة الثقيلة تؤكد ما سبق أن قلته مراراً وتكراراً من أن أخطر ما يواجه مصر الآن هو عمليات تهريب الأسلحة الثقيلة، وأن هذا جزء من مخطط دولى لتقسيم مصر..!
فأى عَيّل فى كى. جى. ون كان يعلم أن ال آر. بى. جى وقواعد الصواريخ المضادة للطائرات والمدن لم يتم تهريبها للإرهابيين فى سيناء أو فى الصعيد، علشان يجاملوا بيها فى فرح ابن العمدة أو علشان يلعبوا بيها أتارى.. العملية أخطر بكثير مما نتخيل..!
ربنا يستر ويحفظ مصر من كيد الكائدين.. اللهم آمين.
****
دماغ مقاس 43 !
حاخامات إسرائيل المتطرفون الذين أطلقوا دعوة لاحتلال القاهرة - أى والله - احتلال القاهرة، واضح أن أدمغة حضراتهم متكلفة جدا؟ ولأنها متكلفة فهى بالمقاس.. يعنى هناك حاخام دماغه مقاس 42 وهناك آخر دماغه مقاس 43.. وكل الأدمغة بتنقسم قسمين أدمغة برباط وأدمغة من غير رباط..!
نقول إيه مبروك على الأرض..!!
****
حتى البوسة بقت فشنك!
واضح أنى طلعت دقة قديمة قوى فقد كنت أعتقد حتى وقت قريب أن البوسة، يعنى القبلة باللغة العربية الفصحى، زى القفة أم ودنين لازم يشيلوها اتنين.. لكننى اكتشفت إنى راجل قديم قوى من أيام الأبيض والأسود وأنى نايم فى العسل والدنيا من حولى بتتقدم! فقد اخترع رجل سنغافورى جهاز للبوس الإلكترونى، أى والله البوس الإلكترونى، بحيث يمكن للعشاق تقبيل بعضهما من خلال الكمبيوتر مهما بعدت المسافات بينهما!
وهذا الجهاز بالتأكيد صدمة كبيرة للناس العاطفيين اللى زى حالاتى اللى عايشين من أيام الأبيض والأسود.. زمن البوس الجميل.. وهو الزمن الذى كان يغنى فيه فطاحل الغناء للبوس والقبلات..
خد عندك سيدة الغناء العربى كوكب الشرق أم كلثوم وهى بتقول: القبلة أن كانت للملهوف اللى على ورد الخد يلوف.. ياخدها بدال الواحدة ألوف ولا يخشى للناس ملام..!
أما اللواء الدكتور محمد عبدالوهاب موسيقار الأجيال فقد غنى: بلاش تبوسنى فى عيناى.. البوسة فى العين تفرق! وبصراحة لغاية دلوقت ومنذ أكثر من نصف قرن مش عارف إزاى البوسة تتاخد فى العين.. إلا إذا كان حضرته فاهم إنها قطرة انتبيوتك يعنى لزوم علاج الرمد الربيعى لاموأخذة!
أنا خايف بعد ما بقى البوس بالكمبيوتر.. إن الجواز كمان يبقى بالكمبيوتر.. وكله فى السريع.. ويلاقى الواحد نفسه فى النهاية مخلف ولد وبنت ولاب توب..وفلاشة.!