تناتيش

* «الشكرمون طاح فى الترالولى».. اللى يعرف العبارة دى معناها إيه.. هايعرف بالضبط مين ورا الحرايق اللى بتحصل فى البلد من غير سبب، وهايعرف إيه أصل وفصل اللى بيحصل فى العباسية.. ليه الناس واقفة هناك.. وبتموت ليه..؟ وعايزين إيه..؟!
بالمناسبة حتى لا يتهمنى أحد بخدش الحياء العام.. أعتقد أن «الشكرمون طاح فى الترالولى» عبارة مش أبيحة.. والله أعلم..!
* آخر نكتة على الفيس بوك بتقول إنهم سألوا أفريقى وأوروبى وأمريكى وعربى عن رأيهم فى نقص الغذاء فى العالم؟
قال الأفريقى: ما معنى الغذاء..؟!
وقال الأوروبى: ما معنى نقص..؟!
وقال الأمريكى: ما معنى العالم..؟!
أما العربى فتساءل: ما معنى رأيك..؟!
* الكثيرون وأنا منهم بيسألوا لماذا التقت السفيرة الأمريكية آن باترسون بالمهندس خيرت الشاطر نائب رئيس جماعة الإخوان «المحظوظة».. فى مكتبه بمدينة نصر لمدة ساعتين..
متهيألى والله أعلم، أنهم ماكانوش بيناقشوا حاجة بطالة لا سمح الله، ولا بيتكلموا عن الشئون الداخلية والأحداث الجارية، لكنهم كانوا بيلعبوا عشرة طاولة محبوسة مع كوبايتين شاى بالنعناع من اللى فى تذكرة داود..!
* «أمناء» الشرطة الذين اختاروا هذا التوقيت بالذات للمطالبة بمطالب فئوية وهز ثقة جهاز الشرطة واضح أنهم لا «أمناء» ولا حاجة..!!
* بصراحة حاجة تغيظ..!!
إزاى يختاروا أفضل 50 مطعماً فى العالم مافيهمش ولا مطعم مصرى واحد..؟!!
إزاى يختاروا مطاعم «لوشاتوبريان» و«لاربيج» و«بير جانيير» و«لاسترانس» فى فرنسا ويسيبوا مطاعم «زيزو نتانة» و«عبده تلوث» ملك سندوتشات النابالم والحبشتكنات، و«بحة» بتاع الناصرية ملك الفشة والكرشة والممبار..؟!
نقول إيه..؟! عالم بتاعة شهادات صحيح..!!