فاضى؟؟ طب ما تشتغل «إعلامى»

كتبت : دينا عبد الحميد ... سؤال محيرنى بقاله كتير .. هو خريج إعلام فى البلد دى بيشتغل إيه ؟؟
الحكاية وما فيها إن من أول يوم دخلت الكلية باسمع من الدكاترة واللى حواليا إن مجال العمل مرتبط باللى يثبت ذاته وقدراته، لأننا نختلف عن الآخرين، إحنا وبلا فخر «مهنة من لا مهنة له».!!
زمان كنا بنشوف إعلاميين متمكنين من لغتهم، ليهم قواعد بتحكم المادة الاعلامية اللى بتتقدم لينا، ملتزمين بالاحترام المتبادل بينهم وبين الجمهور، أما فى السنوات الأخيرة حصلت حالة «استعباط» كل اللى ساب مهنته لسبب ما، كورة أو تمثيل أو سياسة، بدأ يدور على حاجة تسلى فراغه يعمل إيه ؟ بسيطة يشتغل إعلامى، وهو الإنسان إيه غير كاريزما وموهبة وشوية حاجات فوق بعض.
أى منطق يقول إن شباب قمة فى الإبداع والموهبة وكمان دارس ومتقن للاعلام، يكون حلمه بس يلحق مكان فى مجاله، لأن الأماكن الكبيرة محجوزة للى عنده واسطة أو فلوس يقدر يعمل بيها مؤسسة خاصة بيه، ده طبعا غير نظرية أنت لسه صغير يا حبيبى، سيب الكبار يديروا واتفرج عليهم، لأننا للأسف فى زمن «اللى مالهمش فيها إعلاميين، وإحنا مش معاهم».!!