السيسي: نعاني من إشكالية ومتاهة التخلف.. و3 أسباب وراء الأزمة

قال الرئيس عبدالفتاح السيسي، إن مصر لديها إشكالية التخلف، التي تكونت بسبب الجهل والفقر وقلة الوعي
وأضاف السيسي خلال افتتاح مشروعات في أسيوط: اسمحوا لي أوجه كل التحية والتقدير لأهالينا بصفة خاصة في الصعيد ولكل المصريين، هذا يوم من مجموعة أيام مخصصين لافتتاح مشروعات تم الانتهاء منها في الصعيد، بنتكلم على مشروعات النهاردة ومشروعات أخرى خلال الأيام المقبلة في إطار أسبوع الصعيد، وده بيعكس اهتمام الدولة وحرصها على تجاوز كل الصعاب اللي كانت موجودة في الجمهورية وفي الصعيد تحديدا، كان نصيب الصعيد من التنمية أقل من محافظات الجمهورية، وبالتالي حجم العجز زاد شوية، بنحاول نخلي الدولة على نسق واحد، ميبقاش فيه محافظة تتفوق على تانية، اللي هيكمل ده، موضوع حياة كريمة، هيغطي كل المسائل، زي ما شوفنا في عرض الإسكان والصحة والتعليم.
وتابع: عايز أقول لأهالينا في الصعيد وللمصريين، إن حجم الجهد اللي تم بذله في 7 سنوات، يتعدى سنوات طويلة من العمل والإنفاق، بنتكلم على أرقام ضخمة جدا المبالغ، عشان نحقق ما نتمناه لمصر.
وشرح السيسي: هل موضوع التنمية وجهد الدولة يتوقف حتى بعد ما نخلص حياة كريمة، لأ، حركة التطوير والجودة والرفاهية، تتطلب أن نستمر في العمل وتحسينه، إحنا عندنا إشكالية التخلف، أو متاهة التخلف، أسبابها الجهل والفقر وقلة الوعي، لهم تأثير متبادل على بعض، مش هنقدر نحارب الجهل غير بقدرات اقتصادية عشان نعلم كويس، طب هل إتاحة التعليم فقط، تحقق جودته؟ أكيد هيساهم، لكن الجودة تحتاج جهدا آخر.
وأوضح: تم بذل جهد كبير من الدولة ومنكم، وكان توفيق ربنا كبير، وهفضل في كل مناسبة أكرر الحمد والشكر، إنه وفقنا ومكننا، وأقدر أقول بتواضع، اللي اتعمل ميتعملش، والله والله والله، ما يتعمل، لا لظروفنا ولا قدراتنا المالية، عشان بس تبقى الأمور واضحة، بالمناسبة، أي كلام بتكلم معاكم فيه، عمري ما روحي المعنوية تأثرت، عشان شايف التحديات من 20 أو 25 سنة، مش جديد عليا، مش مصدوم من الواقع، لكن محتاجين كلنا نشوفه زي بعض.