م الآخر| الدنيا ورقة كوتشينه

الدنيا ورقة كوتشينه
يوم تخسر
يوم تاني بتكسب
يوم حظك
يطلع في الشايب
أو يطلع
في البنت الملعب
ياسلام لما يجيلك كومي
الكومي بتبصر بيها
يا بتاكل وتلم الليلة
بالكومي عمرك ماهتغلب
والسعد في الواد التعلب
الواد التعلب بيقش
وتملى بيفضى الملعب
والدنيا بتيجي
في ورقة أص
لو عايزة تضحك
راح تضحك
لو صاحي بدري خمسة الفجر
أو صاحي حتى تلاتة العصر
مش فارق واحد عن واحد
غير بس الحظ
وبتكسب مرة بالاتنين
أو برضو ستة محظوظة
الدنيا إديتها ختم النصر
مش فارقه ورقة كوتشينه
عن فيلا وقصر
فيه ناس كسبتهم في العشرة
وناس خسايرهم مالهاش حصر
وأنا واقف تايه
مش عارف ألعبها إزاي
أنا أصلي مليش في الكوتشينه
لكني غاوى كتابة الشعر
وعزف الناي
راح أحاول أدخل في اللعبة
هبدأ في اللعب الدور الجاي
بس إنت ساعدني ياعم الحظ
ولا استنى العشرة الجاية
أنا عازمك على واحد شاي
علمني فنون اللعبة ياحظ
التسعة أعمل بيها إيه
والبصرة هتفدني في إيه
والشايب والواد والبنت
مين فيهم أقوى من التاني
فهمني اللعبة بخباياها
وأنا شاطر بفهم في ثواني
وذكاوتي حاجه ما أقولكش
ذكاوه أصلي ورباني
وكمان بعرف أخطط وارسم
بس ناقصني شوية حظ
قالي الحظ ياعم الناصح
هو اللعبة وهو أساسها
قالي ذكاوتك مالهاش عازة
عندك حظ
إدي ذكاوتك يابني إجازة
حظك بس هتكسب بيه
لو من غيره دخلت اللعبة
تبقى ياصاحبي دخلت جنازة
خليك بره اللعبة احسن لك
واكتب شعر بوزن وقافيه
اعزف مقطوعة على الناي
أو قلب في كتاب جغرافيا
ما إنت ملكش
في نهب ونصب
ولا ليك في
ملاوعة ولا مناكفة
والدنيا لعبه عايزة الحظ
والحظ حظك مش عافية