النهاردة حكاية الشقاوة موجودة في كل بيت، وبالأخص في كل ست مصرية أو مش مصرية.. الغريزة اللي ربنا خلقها في كل بنت.. أول ما البنت تحب بتبدأ كرات الغريزة دي تجري في دمها ويا سلام لو حالفها القدر واتجوزت اللي بتحبه..
• أمينة اللى اسمها رنا
أجواء المستشفى ورائحة الأدوية تفحفح في كل الطرقات.. وأصوات هامسة متداخلة من الأطباء والممرضات.. وجرس تنبيه يرن من إحدى الغرف في نهاية "الطرقة".. والممرضات بيعزموا على بعض مين هيروح للحالة المريضة..
وهناك.. ترقد لولي المريضة على السرير بعد أن فاقت من العملية.. وجوزها بجوارها "بيقلب" في تليفونه.. ولقى "missed call" من رقم غريب.. شافه على true caller app، هذا التطبيق الذي يتعرف على بعض الأرقام، ووجد الرقم مسجل تحت اسم "رنا المستشفى".. لما حكى لي، اعتقدنا إن ممكن حد في الإدارة أو الحسابات اتصل بيه لأي سبب..
وفجأة الدنيا لفت بلولي.. وغابت لولي عن الوعي.. فضرب الزوج الجرس للاستعانة بالطبيبة.. وبعد ما الممرضات عزموا على بعض شوية مين هيروح للحالة المريضة "لولي".. دخلت إحداهن.. توتر وقلق ومحاولة إسعاف لولي بالمحاليل.. وبعدين نزلوا ضهر السرير، ورفعوا رجلها عشان الدم يوصل للمخ.. وفي الوقت ده، سمعت لولي جوزها من بعدين بيزعق في التليفون: "أنا مش فاضي للكلام ده" وقفل الخط.. بدأت أفوق وبصيت له.. قال لي "نفس الرقم اللي اتصل قبل كده.. بتقول اسمها أمينة وبتدلع!".
أوووبا.. واحدة عايزة تخطف جوزي! وفجأة اللي كانت تعبانة والسرير مقلوب بيها فاقت.. وعدلت السرير.. أدرينالين الغيرة ضرب في نافوخها.. وقالت للممرضة اللي كانت معاها في الأوضة.. مين الممرضات اللي موجودين في الشيفت؟ البنت بسذاجة ردت بمجموعة من الأسامي منهم رنا في الشيفت الصباحي.. "يبقى رنا كانت موجودة وخدت رقم جوزي من أوراقي في المستشفى عشان تكلمه و" تدلع" وتصطاد في المياه العكرة وتقول إنها أمينة.. ما هي مراته غلبانة وتعبانة ومش هتركز معاه".
- اجمعي لي كل ممرضات الدور
- ليه بس يا فندم
- مفيش عايزاهم ضروري
دخلوا كل الممرضات إلا رنا.. مجاتش.. فاكتشفت لولي إن الشيفت الصباحي انتهى والممرضات روحوا.. وإن رنا كمان تاني يوم إجازة ومش جاية..
الممرضات مكانوش فاهمين فيه إيه.. بس حسوا إن فيه حاجة غريبة وسألوني:
- حضرتك قصدك على رنا؟
- عرفتوا منين؟ هي متعودة؟
- دايما (بضحك وسخرية)
وفي اليوم التالي.. كنت خلاص هروح من المستشفى.. وقبل ما أمشي دخلت عليا مشرفة الممرضات عشان تعرف إيه اللي حصل إمبارح.. ما رضيتش أقول لها.. قلت لها موقف وعدى ومش عايزة أعمل مشاكل.. قلبي بقى طيب وحنين.. بس تفتكروا الموقف خلص على كده؟
هيهات.. روحت لولي البيت.. وبالليل قررت تكلم رنا وتعمل لها مصيدة.. طلبت من جوزي يطلب الرقم ولما ترد يقول لها إنتي كلمتيني إمبارح.. وبعدين يديني التليفون..
- تحبي أقول لك أمينة ولا رنا أحسن؟ (بلهجة استخفاف)
انهالت عليا بموجة من الاعتذرات وإنها أول مرة تعمل كده ومكانش قصدها حاجة (قصدها شريف يا جماعة).. وإن مشرفة الممرضات قالت لها إنها اتحايلت عليا عشان ما اعملش مشكلة (أكيد قالت لها كده عشان تقرص ودنها وتخوفها ومفيش مانع تبقى جميلة إنها أنقذتها من قلبي المفترس).. وانتهت حدوتة أمينة اللي اسمها رنا.. ودخلت المستشفى مرات كتير بعد كده كزائرة وكمريضة.. وكل مرة أدور على رنا مش بلاقيها.. مش عارفة مشيت ولا موجودة ومتنكرة في اسم منال!

يمكنك التواصل مع الكاتبة من هنا
فيس بوك
تويتر