يوميات عم بخ

تيران وصنافير سعودية فى يوم صحابى زنوا عليا أطلع معاهم كم يوم سينا، واتحججت بالفلوس والشغل.. عرفت آخد إجازة وقالوا لى هنشيلك مصاريف.. مبقاش ليا حجة.. وسافرت وقضيت أول يوم ع البحر غنا ورقص واسترخاء بس.. تانى يوم قالوا لى يلا هنعمل رحلة غطس.. كنت فرحان أوى الصراحة.. عشان هلبس الزعانف.. كنت أول مرة هلبسها وفرحان.. وركبنا لانش وفى نص البحر نطينا.. وهوب نزلت كتير تحت وسرحت منهم وتوهت frown emoticon ولقيت نفسى خارج فى حتة تانية خالص.. بس لقيت زى حجر كبير بعيد شوية.. عمت لحد عنده وطلعت ريحت عليه.. كان عريضا وواسعا.. قعدت أفتكر ايه ده.. لحد ما افتكرت إن دى جزيرة درسناها اسمها تيران.. فردت جسمى وعينى غفلت.. وبدأت حلم جميل.. بنات بكينى حواليا فى كل الجزيرة.. كم واحدة بيرقصوا وكم واحدة بيعملوا لى مساج واللى بتدينى فاكهة واللى بتدينى عصير.. كنت مبسوط وعمال أخد بس.. ونايم وعمال أحرك راسى مع المزيكا وبنت منهم بتلاغينى.. سرحت فيها.. لقيت فجأة ناس بتزق فيا وأنا نايم.. لقيت نفسى نايم ع الأرض وبلبس الغطس.. و10 لابسين كاكى وشال وعقال على رأسهم وبيخبطونى فى كتفى وبيصحونى.. عملت نايم.. لحد ما شالونى.. رديت عليهم أنا فين وأنتم مين.. واحد رد.. انت بتعمل ايش هون يا صبى.. وفين جواز سفرك.. قعدت أضحك وأقولهم أنتم أكيد الكاميرا الخفية صح.. أستاذ رامز جلال هيطلع دلوقتى وهتصور معاه.. واحد منهم زعق جامد وقاللى هذا ما مكان تهريج ولا موقف هزار.. شكلك جاى هون هجرة غير شرعية.. اقبضوا عليه حتى يتم ترحيله خارج البلاد.. قلت دى شكلها بجد.. قلت يا باشا أنا كنت بعوم وبغطس وطلعت قلت أريح شوية.. هى مش دى تيران برضو بتاعتنا.. ضحك أووى وقاللى بتاعتكم هو أنت سعودى.. قولتله لا من شبرا يا باشا.. قاللى يبقى جاى هجرة غير شرعية.. وقبضوا عليا ولقيتهم بيتصلوا بالسلطات المصرية وبيسلمونى ليهم عن طريق الصليب الأحمر.. وطبعًا السلطات المصرية عملت الواجب وزيادة.. صحيت من النوم لقيت نفسى كنت على سريرى وكنت بحلم.. بس كان حلم سخيف وافزع من الكابوس.. صحيت بصرخ وبقول تيران وصنافير م... ماكملتش الجملة إلا ولقيت نفسى بنضرب على دماغى بس المرة دى غيبوبة.