الإنضمام ل"داعش" أغربهم.. 6 حيل نسائية للإنتقام من خيانة الأزواج

إن كيدهن عظيم".. كثيرًا ما يردد البعض وخاصة الرجال تلك الآية الكريمة، واصفين بها النساء بأن كيدهن عظيم، نظرًا للمواقف الانتقامية التي تقوم خلالها المرأة باستخدام ردود فعل قوية لردع بعض المواقف التي تتعدى عليها.
إزاي تنتقمي من جوزك الخاين؟
الخيانة الزوجية، من أكثر المواقف التي تظهر قوة وجبروت المرأة، لذا تواصلت "الفجر" مع عدد من السيدات، سمعت من خلالها إجابتهن على تساؤل "هتعملي ايه لو اكتشفتي خيانة جوزك"، وكانت الإجابات جميعها كاشفة عن كيد المرأة الذي توظفه كل سيدة لخدمة غرائزها الانتقامية.
الإنضمام ل"داعش"
وضعت نادية صبحي، خطة محكمة تعاقب بها زوجها على خيانته، فقالت في قصتها: "انا عرفت أن جوزي بيكلم واحدة على الفيس بوك ومسميه نفسها الفراشة الذهبية، وهو مسمي نفسه ابن عز، فعملت أكونت جديد وسميت نفسي "ابو القعقاع" ونزلت بوستات عن القتل والذبح، وبعدها كلمت جوزي وقولتله أن الفراشة الذهبية دي مراته، وأني هعاقبه بالذبح وقعدت اقوله معلومات عنه، جوزي خاف ومسح الفيس بوك والواتساب من عنده ومن وقتها بقا يصلي وملتزم دينياً كمان".
التهديد والفضيحة
ورأت منى أحمد، أن تهديده وفضحه هما خير انتقام، فقالت: "اللي أتأكدت أن جوزها بيخونها، تراقبه بهدوء، وتحاول توصل لصور وشات، وتعمل أكونت فيك وتهدده وتبتذه بالصور والشات، وتقوله لو معملتش اللي أنا عاوزاه هقول لمراتك أنك بتخونها، واتعبيلوا أعصابه بطلبات غريبة، وبعد كده اعملي قاعدة عرب هاتي الناس الكبيرة في العائلتين وافضحيه قدامهم وقوليهم أتصرف إزاى وتمسح بكرامته الأرض قدامهم وتذله بس متطلقش وتخرب بيتها بس هو هيحرم يعمل كده".
الخداع عن طريق الخيانة بنفس الطريقة
وقالت منى عبد المطلب، أن خداعه بنفس الطريقة، من خلال إهامه بأني أخونه هو أفضل طرق الإنتقام، فقالت: "الست اللي جوزها بيخونها لازم تروشه وراها وتخليه هو اللي يتروش ويحس انها بتعمل حاجه مريبه، وبنفس طريقته يعني لو بيخونها على الفيس بوك، تبقى تعمل محادثات بينها وبين اي صاحباتها وتسميه باسم وهمي كأنها بتكلم راجل ولما ييجي يواجهها تديله الصور بتاعته وتكشف قدامه الحقيقه وتخليه زي الكتكوت قدامها عشان تعرف تكسر عينيه وتخليه يقاسي زي ماهي قاست منه".
تفتح دماغه
ورأت سمية سمير، أن الخيانة الزوجية تكون تقصير من الزوجة، ففي البداية يجب أن تعالج تقصيرها، وإذا لم يحل تغيرها الموقف بضرب الزوج خير علاج للانتقام، فتقول: "الست اللي جوزها بيخونها لازم تتغير 180 درجة معاه، تهتم بنفسها، وتتغير خالص لبس شيك تسريحة شعر ماكياج وتعاملة بكل ود وحب وتعمله مفاجأة وكل اللي بيحبه .. تستحمل وتعصر علي نفسها لمونة كام يوم؛ لو اتغير بفضل الله تبقي دي كانت نزوة والشيطان شاطر ونسامح بعض، غير كده تودي عيالها في أي حته وتقفل بابها عليهم وهي في قمة شياكتها طبعا، وتفضفض بقي زي ماهي عاوزة براحتها على الاخر تتدغدغ البيت كله علي دماغه تفتح دماغه هي حرة".
جوزي عنده الإيدز
فيما رأت أميرة محمد، أن الكذب هو وسيلة الزوجة للإنتقام من خيانة زوجها، فتقول: "الست اللي جوزها بيخونها لازم تتصرف بذكاء و تحافظ على بيتها، خطوة واحد تكلم البنت دى و تقولها انا بشكرك جدا من ساعة ما جوزى عرف أنه عنده الايدز و انا مش عارفة أسعده ازاى و مدقش طعم السعادة غير معاكي، البنت اصلا هتترعب و تخاف و عمرها ما هتكلمه".
بلاغ لشرطة الآداب
وأضافت ندى صلاح، أن أحسن إنتقام للزوج الخائن، هو تسليمه لشرطة الآداب، فقالت: "لو اكتشفتي خيانة جوزك، حاولي تعرفي عنوان اللي بيخونك معاها، وتعرفي الميعاد اللي جوزك بيروحلها فيه، وتعملي أكونت جديد علي الفيس و بأي إسم، وتدخلي علي أي صفحة شمال وتشقطي راجل شمال برضو وتتفقي معاه يروحلها علي عنوانها وتديه بيانتها مظبوطة، اسمها سنها شكلها لون شعرها وتبعتي للراجل الشمال صورة ليها وتتفقي مع الراجل اياه يروح ف معاد جوزها فيه هناك ويسأل عليها وبس كده الباقي هايمشي لوحده، وبعدها تبلغي شرطة الاداب ليهم كلهم".