هيثم طه يكتب: إعمل الصح و إختار الوظيفه الصح

اكتر تلات حاجات غلط ممكن تعملهم في حق نفسك هما إنك تختار الوظيفه الغلط , و تستمر فيها, و تحرم نفسك من الإستمتاع بالوظيفه إلى إنت اصلا مميز فيها
خلينا نتفق إن الظروف الإقتصاديه و الإجتماعيه ممكن تظطرك تقبل بوظيفه معينه ممكن قوى تكون مش حاببها و ده حصل معانا كلنا و هيستمر يحصل بس إلى هتعمله و هيميزك و يخليك تعمل الصح
إنك ماشى يا عم هتشتغل الوظيفه اى ما كانت سيلز او خدمه عملا ( انا بقول الإتنين دول على سبيل المثال علشان دول اكتر وظايف مطلوبه في السوق)و لكن بعد الشيفت عندك إختيار من إتنين القهوه او تشتغل على نفسك
لو مش حابب وظيفه معينه لازم تعرف إن عمرك فيها قصير و مهما طولت فيها هتبقى برضه مؤقته بالنسبه ليك
بيقول الناس :" الواحد دكتور نفسه" بمعنى إنك لازم تكون اكتر واحد عارف نفسك .. انا مستواى في الإنجليزى إيه ؟ ولازم تكون صريح مع نفسك ؟ شايف نفسك مسيطر ..خلاص هات فيلم سينما مش مترجم و شوف حتفهم منه كام في الميه
لازم اعرف مهاراتى و هتناسب الوظيفه إلأى بحبها ولا لأ .. يعنى مثلا انا بحب اتعامل مع ناس يبقى ممكن خدمه عملا او سيلز انا فوق كده معايا كام لغه حلوه يبقى انا ممكن اشتغل في السياحه و لو فوق كده انا عندى ثقافه قويه شويه يبقى اقدم في الخارجيه او في العلاقات العامه في اى شركه عالميه
طيب يا سيدى انا عارف مهاراتى و عارف الوظيفه بس الدنيا ماشيه تظبيط و انا ما عنديش واسطه ... لا غلط ربنا زى ما إسمه الرزاق لا كمان إسمه العدل .. إدخل على النت شوف الشركات او الهيئات إلى فيهم التخصص إلى بتدور عليه و قدم و تابع و حارب و ظبط نفسك و إتاكد إن ربنا عمره ما هيخزلك و إنت كده كده شغال في شغلك التانى ..يعنى مش هتخسر حاجه
إشتغل ..علشان بلدك..علشان اهلك..علشان مجتمعك.. علشان اولادك يعيشو حياه احسن من إلى إنت عايشها