جريمة في عيادة طبيب

مساء الخير استاذة نيفين
انا في مصيبة ارجو الرد سريعا ونشر مشكلتي لعل في القراء محامي او اي مسؤول يساعدني في حل مشكلتي ,
انا كنت من فترة اتعرضت لحالة اكتئاب شديدة ورحت لدكتور اتعالج وفعلا بالإنتظام معاه حالتي إتحسنت لكن مع الوقت حسيت إنيبميل للدكتور وفاتحني في إنه عايز يرتبط بية المهم مش هطول عليكي .. اتخطبنا فعلا وكان هوة مستعجل جدا على الجواز بس معرفش ليه انا قلقت من استعجاله فطلبت اننا نعمل كتب كتاب بس بعدين الفرح بحجة اني لسة ما خلصتش ترتيب حاجتي دة غير ان اهلي ما كنوش موافقين لان سلوكه كان غريب شوية من وجهة نظرهم كان مجنون على حد تعبير امي وكان دايما مش على بعضه .. بعد فترة من كلام امي لاحظت ان تعاملاته معايا فيها نفس الجنان والقلق ابتدا يدخل قلبي فقررت اركز معاه شوية وقلقي زاد لما لقيته عمال يزن على الجواز خصوصا ان الشقة لسة ما خلصتش .. المهم .. في مرة اتقابلنا وفي وسط كلامنا مع بعض اتنرفز علية وقالي مش بعد كل مجهودي معاكي دة تأخري الجوازة .. بصراحة الكلمة خلتني أقلق منه مع إنها ممكن تبان عادية لكن مع كلام أمي الدائم من قلقها من نظراته وكلامه الغريب ابتديت اركز معاه واتابع تصرفاته وكمان ضغطت عليه لغايه ما اعترف بإنه فعلا حبني اثناء علاجه ليه ودة دفعه لانه يكتبلي ادوية تساعدني على وضعي في حالة استرخاء وقبول اي حاجة اسمعها واستقبلها كمان دة غير الجلسات الكلامية اللي بيها خلاني اتصوره فتى أحلامي دة معناه انه استغل مهنته في التأثير عليه .. انا خفت جدا منه وقررت بيني وبين نفسي ان الجوازة دي مش هتتم لكن برضه خفت من مواجهة اهلي من فسخ الزيجة او كتب الكتاب لاني كنت متمسكة بيه جدا رغم رفضهم وهسمع منهم توبيخ جامد قوي وفي نفس الوقت مش عارفة ازاي هاخد منه حقي في اللي عمله فية بإستغلاله ليه مهنيا دة غير المصاريف الكتيرة اللي اهلي صرفوها على تجهيزي وشراء الموبيليا في شقة الزوجية .. ارجو إفادتي سريعا وشكرا
منال

فضفضة
محررة الصفحة .. نيفين حجازي
شوفي يا منال .. في ستين داهية أي مصاريف وأي إعتبارات غير مصلحتك .. الدكتور دة واضح إنه مريض وهوة اللي محتاج علاج .. لازم تحكي لأسرتك الخدعة اللي إتعرضتي ليها وبسرعة وإنسي موضوع التوبيخ لانه مش اهم من مصلحتك وتروحي فورا نقابة الأطباء تقدمي شكوى وتروحي قسم الشرطة اللي انتي تابعة له تعملي محضر وبأي طريقة تطلقي من الشخص العيان دة وبسرعة .
[email protected]