يوسف عزت يكتب: للأسف..معادتش مقاسي

وانا بدور في الدولاب على لبس جديد البسه
لقيت حاجات أول مرة أشوفها
ولبس أول مرة المسه
اتفاجئت بالماركات المركونه
وجزمة شيك مدفونة
استعجبت ازاي كل ده كنت ناسي
لكن للاسف ..اللبس ده معادش مقاسي
وانا بقلب في لعب الطفولة
أيام ماكان انبساطي
في منتهى السهولة
افتكرت أيام ماكنت هادي وبرئ
وعايشها بابتسامة صافية
ومش عايل هم الطريق
ولما أزعل أقل طبطبه تيجي وتواسي
لكن للاسف.. اللعب دي معادتش مقاسي
وانا في خروجه مع صحاب ليَّ قدام
الضحك زمان مكانش مفارقنا
لكن نادرا ماطلعوني لقدام
قلت ياه ما اقعد معاهم شوية طويلة بقى
مايمكن معاهم أنسى البكا
وخدلك كرسي ويا الكراسي
لكن للاسف..الصحاب دول معادوش مقاسي
وانا بقرا في كشكول احلامي القديمة
ابتسمت ابتسامة اعجاب
مع حسرة في قلبي اليمه
ياما حاولت ليها اوصل
وياما وقعت في حفرة مفيش فايدة
ومع التكرار افشل
طيب ماتقوم تجرب تاني
دي الاحلام في الحياه شيء أساسي
لكن للاسف ..الاحلام دي معادتش مقاسي
يمكن كبرت و أتغيرت
يمكن طولت و أتأثرت
يمكن نظرتي اختلفت في الحياه و الخلق
يمكن العقل أتنور
زي مابيهب رعد وبرق
لكن عمري ماهكون محلك سر
أو أخبط في حيطه وأرجع للخلف در
ولحد مايقف النمو
ولحد ما القلب ينضج
ويكون في علو
هامشي دايما ورا احساسي
ومش بأختيارات غصب عني هقاسي
وعمري ما هلبس حاجة
معادتش مقاسي