رامي رضوان عن أزمة سيول التجمع: «إحنا في الوحل يا خال»

تناول الإعلامي رامي رضوان، أزمة غرق المدن الجديدة بسبب مياه الأمطار، مؤكدا أن هناك عددا من الأسس لمعادلة النجاح تعتمد عليها الدول المتقدمة أبرزها تطبيق الثواب والعقاب، والمتابعة والرقابة والصيانة المستمرة، والإنتاج، والالتزام بالمواعيد والدقة ووضع نظام ثابت ومعاقبة من يخرج عنه.
وقال رضوان، عبر صفحته الرسمية على موقع "فيس بوك": "ده احنا في الوحل ياخال.. الأمطار غرقت شوارع التجمع ووقعت سقف 2 من أكبر المولات وغرقت جراچات مجموعة من أكبر مولات التجمع المملوكة لمستثمرين كبار وتشرف على أعمالهم شركات أجنبية وغرقت مدينتي والرحاب وقرى أخرى في التجمع ومحيط مدينة الشروق".
وأضاف: "مما سبق نستطيع بكل وضوح أن نرى أننا في كارثة حقيقية، نستطيع أن نرى أننا في الوحل، والقصة مش الحكومة فاشلة ولا محافظ متكاسل ولا رئيس جهاز أي كلام، ولا هي مستثمرين جشعين عايزين يكسبوا أكتر ولا مقاولين حرامية بيخسروا ولا عمال بيكلفتوا شغلهم".
وتابع: "مش هنفضل طول عمرنا نتكلم عن فين الضمير وفين الذمة.. خلاااااص بححححححح.. راحوا!!!! ومش هيرجعوا لأن ناس كتير اعتادت العيشة بدونهم وتحجرت قلوبهم وانعدم الشعور بحرمانية أو بخجل من ارتكاب خطأ أو الضلوع في فساد أو السرقة بطرق مباشرة وغير مباشرة، ولو اعتمدنا على إن الضمير يصحى هنفضل نرجع للخلف أكتر، وكل بلاد العالم المتقدمة اللي بننبهر بها وبننظر لها كنموذج عرفوا المعادلة من زمان.. ييجي 40 -50 سنة وبيطبقوها وعشان كده نجحوا، معادلة العمل.. الشغل".
وأوضح رضوان قواعد النجاح من وجهة نظره قائلا: "شغل يعني: ثواب وعقاب بلا عواطف أو تنازلات، واللي يغلط أو يقصر في عمله أو يتقاعس يتحاسب علنا مش نسيبه ولا نداري عليه ونخاف على مشاعره، هو ماخافش على نفسه، أنا هخاف عليه أكتر منه؟!
شغل يعني: تنتج تكسب أكتر.. تكسل تمشي وييجي غيرك يشتغل ويكسب.
شغل يعني: الصيانة، اللي هي جزء أصيل من أي برنامج عمل، مش رفاهية، ولا يترك الأمر للأهواء والتقييمات الفردية أو الجماعية حتى، حاجة تحتاج صيانة كل شهر، يبقى كل شهر، مش شهر ويوم أو شهر وساعة، حاجة عمرها الافتراضي سنة يبقى بعد سنة بتتغير مش تتساب لحد ما تقول جاااااي.
شغل يعني: متابعة ورقابة، بأشخاص وكاميرات وخلافه لضمان عدم وجود أي خلل ولو واحد في الألف في أي شيء، وإن وجد يتم التدخل الفوري لمنعه أو تجاوزه ومحاسبة المسئول.
شغل يعني: دقة، يعني طيران في ميعاده وقطارات في ميعادها ومترو في ميعاده وناس على مكاتبها في مواعيدها وكل ده بالثانية، جو ماجتش من دقيقة ولا خمسة ولا عشرة بتفتح في ساعة واتنين، ده عبث.
وكمان دقة في تنفيذ واستلام كل مهمة تنفذ، بلاااااااااااا مواربة أو تجاوزات ولو بنسبة واحد في المليون.
شغل يعني: سيستم، نظام واللي يخرج عنه لحظة يخرج منه للابد أو يتعاقب ويدفع ثمن غلطته، النظام ده اللي يخليك شايف كل حاجة ماشية زي الساعة، زي المكن، مافيش هفوة فيها.
شغل يعني: شغل مش يعني إن شاء الله وسيبها على الله وربك يكرم ويا عم ربنا موجود، كل ده أنا وإنتوا عارفينه ومش محتاجين نتكلم فيه، بس ما ينفعش نكون بنردد الكلام ده بمدأ إننا نرمي تكالنا على ربنا واحنا ما بنتحركش ولا نشتغل، ما تقوليش الشغلانة هتبقى تمام إن شاء الله وانت بتعملها غلط، ما جيش أقولك دي فيها حاجة مش مضبوطة فتقولي يا راجل خليها على الله، ونعم بالله بس مافيش حاجة اسمها كده، ربنا قال لنا نسعى، اسع واسأله التوفيق، اسع واذكره في كل خطوة، بس علينا السعي والعمل بجدية وتنفيذ الصحيح، مش ريّح وأنتخ وكله هيمشي لوحده وببركة دعاء الوالدين!".
وختم تدوينته قائلا: "هو ده الشغل، هي دي المعادلة السليمة، وهو ده اللي ممكن ينجدنا من عشوائيتنا في كل شيء، عشان كده كل يوم يعدي من غير ما نضبط المعادلة، من غير تعديل كل ما سبق، هنفضل نغرق، وأكتر من اليومين اللي فاتوا".