الله يرحم

التليفون ابو قرص اللي كان بيرن فقط في العيد الكبير و العيد الصغير و لو في مصيبة نطلب الدكتور ..لاء وكمان لو عايزين نسال او نطمن علي حد من اهلنا في البلد نطلب ترنك وحللني بقي لو الخط جمع معاك...كانت الحياة بسيطة و جميلة وفيها رائحة التلقائية بتاعتنا اللي هي بتاعة زمان ايام جدتي و جدتك , جدتك اللي كانت لما بتبعزأ وتحب تدلعك
, تديك جنيه تجيب ايس كريم وكاراتيه وزجاجة سينالكومشبرة وشيكولاتايه كورونا سايحة وباكو بسكوت شمعدان طازة , ولازم تجيب الباقي عشان ما تتعودش علي الصرف,,,,,,كانت الحياة فيها بركة بجد في كل حاجه ,,في الاكل والشرب والخروج والفسح حتي الناس نفسها كان فيها بركة وخير...اما اليومين دول بقي كلمة بركة انقرضت من حياتنا وتقريبا ما حدش فاكرها اصلا,,كلنا دلوقتي في مباراة كورة مين فينا هيحرز اهداف اكتر,,والاهداف دي محددة ,,يعني مثلا مين فينا معاه موبايل اجدد,,,,مين فينا موديل عربيته احدث من التاني ,,مين فينا بيته دورين مش دور واحد اقصد فيلا منفصلة مش تاون هاوس,,مين فينا مدخل ولاده مدارس انترناشيونال وبالدولار,,
ده غير طبعا المصايف المعروفة اللي بقت موضة مش اكتر ,,يعني انا متاكدة ان معظم الناس اللي بتروح تصيف هناك بتروح بس عشان تتشاف هناك,,,وتلبس المايوه اللي استلفت فلوس عشان تشتريه,,,والنضارة الشمس الكبيرة اللي واكلة نص وشها ومش لايقة عليها اصلا بس موضة فلازم تلبسها ,,ده غير التاتو اللي في الضهر او علي البطن او علي الرقبة وكله طلاسم ا للي عاملينه نفسهم مش فاهمينه بس لازم نعمله عشان نكون شيك,,,,وليه الشعر الاسود اختفي فجاءة , كل الستات ضاربين اصفر واحمر وازرق كمان ,واللي يغيظ بقي ان الاساتذة رجالتهم فرحانين اوي وبيتباهوا بيهن كمان ,طبعا ما هو البيه لابس سبحة في رقبته لحد بطنه و فاتح زراير القميص لحد بطنه برده وماشي بالسيجار يستعرض عضلاته هو كمان ,,,اقول تاني و لا كفاية كدة,,,حاجة تحرق الدم ,,, الناس بقت مزيفة ليه كده,,ومن امتي المظاهر بقت هي اللي بتقيمنا ,,والكارثة الكبيرة ان ماحدش مستمتع بمنظر البحر ولا بالموجة وصوتها النقي اللي بتشيل منك هموم الدنيا وترميها بعيد ,,ولا حد بياخد نفس عميق يخللي اليود يتغلغل جواه يملاه هدوء وسكون ,,ولا حتي واحد قاعد جنب حبيبته بيتغزل فيها و يقولها كلمتين حلوين,,ولا حد جايب معاه سماعه يسمع عليها اغاني هادية تغذي روحه بالفن ,,فين الناس دي,,فين البساطة ,,فين السعادة الحقيقية من غير زيف,,فين الايام دي,,ياتري ممكن نرجعها تاني ولا خلاص,,؟؟؟
هينفع نرجع الزمن الجميل تاني و لا فات المعاد علي رأي الست ,,,,؟؟؟؟