إحم إحم!

مكنتش أعرف إن النهضة بدري متعبة لكن ماما قالتلي بكرة تجني الثمار..قمت زي المؤدبة..إخواتي لبسوني اليونيفورم إللي بنظبطه من رمضان وحطولي شنطة قد الداهية فوق دماغي وبابا رفض يديني مصروف قال إيه خايف يتهموني إني بأتلقي أموالا خارجية وطلب مني أكتفي بالساندويتشات لغاية ما الفترة دي تعدي..وأنا في الباص جعت ومكنش ممكن أستني ثمارالنهضة فأكلت الساندويتشات وقعدت باقي اليوم علي لحم بطني أسمع حواديت مملة مع عيال ملهاش سيرة غيرالمظاهرات والكلام الفاضي ورجعت لقيت ماما بتزعقلي عشان أعمل الواجب..بصراحة أنا زهقت..إمتي الأجازة تيجي عشان ارتاح بقي من الهم ده؟.. (صفحة من مذكرات الصغيرة كلمات في أول يوم دراسي لها في »كي. جي. وان«).