حسين الحانوتى يكتب : خليك اورجانيك

عشان الناس اللي مش عارفه يعني ايه اورجانيك ..الكلمه اللي كلنا سمعناها من الرئيس وهو بيفتتح مشروع الصوب الزراعيه والكلمه اللي بعض المغيبين سمعوها وهات يا تريئه وضحك بدون فهم للمعني والمقصود
كلمة اورجانيك يافصيح وعنتيل لغه معناها إنتاج محاصيل بدون مبيدات أو هرمونات أو مضادات حيوية أو مكونات معدلة وراثيا
ودي بيتم إنتاجها عن طريق بذور من إنتاج معامل البحوث الزراعية
وده كان بيحصل فى فترة من فترات تاريخ مصر بشكل أو بأخر ونتج عنه اللي احنا عايشين فيه دلوقتي من امراض سرطانيه واوبئه وامراض الكبد المنتشره بين طبقات المواطنين المصريين واللي حملة العلاج شغاله فيها الوقتي بدايه من القضاء علي فيروس سي اللي هي سبب من اسباب وجوده وانتشاره
واللي مش اورجانيك بقى حضرة سيادتك يا فصيح يامتفصح محاصيل تحتوى على كل ده من مبيدات وهرمونات و مضادات حيوية و كمان مكونات معدلة وراثيا تعمل كل المصايب اللي قلناها
وده بقى اللي حصل واللي وحضرتك شفته وسمعته والريس يقصده كويس جدا وبقى ده الطبيعى وأسلوب الزراعة فى مصر
بفضل الإهمال ال حصل على مدار 30 سنة سابقه والإهمال ال حصل لمعامل البحوث الزراعية المصرية وعدم دعمها والاعتناء بيها وعدم العمل على إنتاج واستنباط بذور مصرية خالصة زى زمان وزي ما كنا مثال زراعي يحتذي بنا في العالم كله
وبرضو تجميد دور الجمعيات الزراعيه والارشاد في القيام بدورها من دعم وارشاد الفلاح وامداده بلوازم الزراعه
ومننساش تقصير الرقابه علي المبيدات اللي كانت بتدخل وغير مصر بدخولها مصر لخطورتها علي الصحه العامه
وكلنا طبعا عارفين وفاكرين كويس المحاصيل المسرطنة الناتجه من الهرمونات والمبيدات واللي كانت بتدخل البلد تحت رعاية الفاسدين والحرامية واصحاب البيزنس دون مرعاة لصحة وحياة المصريين اللي يهمهم المكاسب
الوقتي فى عهد السيسي بدأنا نرجع تانى للوضع الطبيعي بتاع زمان ومصر نجحت كأول دولة عربية وإفريقية فى انتاج بذور خاصة بيها وهتصدرها كمان
واكيد شوفت وسمعت وقلبك وجعك و رئيس الشركة الأسبانية بيقول إيه عن ال مصر حققته في مجال البذور وانتاج الصوب ومدي جودتها ودرجة الامان في تناولها
ولسة يا ما في الجراب الايام الجايه ومصر هاتكون من أهم دول العالم فى المجال النباتى والزراعى اللي هو في الاساس امن قومي لاي بلد …تحيا مصر…خليك اورجانيك ومتتعبكش الكلمه وكل خيار اورجانيك
وبنزرعلك كمان نخل عشان نعملك تمر اورجانيك…
عشان ياغشيم تبقي تقول بلح