عايز تقول إيه للمطر ؟ .... بقلم الشاعر وحيد وصفى محمد السعيد

باستنى فيك طول الطريق
مين اللي رايح فينا للتانى ؟
مين اللي نازل م السحاب ؟
مين اللي وقت الشمس
.. عاش رحلة غياب ؟
بتعاكس الدمعة اللى مالية عينيَّ
و الا ..
نقطة عرق من وشي طالَّة ؟
مستني دمي ..
.. و الا انا
مستني اشوفك و احضنك ؟
لو كان في آخر قوس قزح
صندوق دهب .. ما يهمّنيش
بتهمني الزهوة اللي في جبين الندى
يا رحلتي
يا اللي ابتديتِ قبل ما يكون الميلاد
قبل الأوان و الحلم
كنتِ مقررة تمشي
جاي من بعيد
مشبوك في ريحة من السما جاية
مربوط في صوت الرعد و الغِيَّة
بمزاجي جاي
علشانِك انتِ
يا نقطة فوق متشعلقة
و نفسي نتقابل بقى!!
إيه يا مطر ؟
مرسوم بكايَ ف دمعِتَك
و انا باشتكي
من كتر ما الشوق خدني ليك
قلبي اللي موجوع م الغياب
ما زهقش من سيرة العتاب
و لا عمرُه تاه في عينيك
لأنك مش مهاود
تحكي لي على طول الطريق
حكاويك مع الليل و السحاب
ما قدرتِش اتسلَّى
أنا طيف و مخنوق م السكوت
و ما خُفتِش ارجع
و الا حتى اشتاق و اموت
يا اللى انت طول عمرَك شقي
مغسولة جدران البيوت
و إيدين تشاور ع السما
يوم طلعِتَك
عصافير ضعيفة ف عِشَّها
و انت اللي جاي
من آخر الرحلة الحزينة تهِشَّها
طب ليه بتيجي ع الضعيف ؟
مش انتَ بتكون مطرحُه
ساعة ما تبقى الدنيا صيف ؟
خاصمتنى؟
و حلفت أرضي تكون جفاف ؟
و قسيت على التربة اليتيمة
و حُشت عنها مَيِّتَك ؟
هو العتاب دايما ً كده !