أغنية للقناة

قناة السويس. القناة الجديدة
قناة للأماني الجميلة السعيدة
تعالي يا دنيا وشوفي الإرادة
.. إذا المصري صمم يجيب البعيدة
قناة شقناها بعزم وإرادة
وكان العمل فيها زي العبادة
ف ليلنا ونهارنا. كافحنا وسهرنا
وصممنا ننجح ولو بالشهادة
لو المصري صمم. مفيش مستحيل
يفكر. يقرر. وصبره الطويل
يغير حياته. ودنياه لأفضل
عشان بكرة يبقي لولاده جميل
زمان لما قرر. ف يوم انه يعبر
وقال الأعادي: لا يمكن ح يقدر
قام المصري يوم ستة عشرة
توكل علي الله. وصلي وكبر
وحقق ف ست ساعات ما أراده
وقدم حياته. مهر نصر لبلاده
وحرر. ورجع أراضيه الشريفة
وصبح انتصاره حكايا لولاده
بقي يعني اللي بني لنا الأهرام
أعجوبة خالدة مدي الأيام
يعجز في يوم عن حفر قناة
تجعل بلاده في أعلي مقام؟!
تعالي يا دنيا وشوفي المراكب
تغني وترقص كما في المواكب
وتحكي حكاية قناتنا الجديدة
بتفتح ايديها وبتقول: مراحب...