{مشهد فقايرى}

(التقى حامد وصديقه سيد قُشَاط بالعتبة، فى نهار رمضان، وبيد الأخير كيس أسود ممتلئ بحصيلة التسوق، وسارا فى اتجاه موقف الميكروباصات)
حامد: كل سنة وأنت حلو يا عزيزى

قُشاط: وأنت طيب ياعم.. (ثم ببعض العصبية) هى شغلانة؟!

حامد: هههههههه معلش، أنا عاذرَك طبعاً

قُشاط: عشان السجاير يعنى؟

حامد: لأ.. علشان أول سنة صيام بتبقى صعبة شوية!

قشاط "بصوت خفيض": ماتزعَّقْش.. ماتفضحنيش

حامد: ماشى ماشى.. بس بجد إيه رأيك فى الصيام؟

قشاط: ماكنتش أعرف أنه حاجة جميلة ورائعة بصراحة

(يستقلان ميكروباص.. يجلس قشاط بجوار سيدة عجوز، ويضع الكيس الكبير بينه وبينها)

السيدة "وهى تزيح الكيس": وسَّع ياخويا الكيس الكبير ده.. هو تقيل كده ليه؟.. فيه إيه ده؟

قشاط"بقنعرة": شوية قراصيا، على جوز، على لوز، على بيكان، على شوية كاجو

السيدة "تدعو بتضرع": ربنا يشفيك يا ابنى.. كل دى أدوية من الأجزخانة؟!

قشاط: أدوية إيه يا حاجة.. دا ياميش

السيدة"بعفوية": يَامِيش الحديدى؟

قشاط: ههههااى.. لأ.. ياميش رمضان، كل سنة وأنتى طيبة

(يتدخل سائق الميكروباص فى الحوار)

السائق: هو سيادتك بتشتغل إيه بالظبط يا باشا؟

قشاط "باستعلاء شديد": أنا موظف فى الحكومة

(فجأة.. يغير السائق خط سير الميكروباص المعتاد)

قشاط: رايح فين يا جدع؟!!

السائق والركاب: مشوار صغير لجهاز الكسب غير المشروع

قشاط "بدهشة": ليييييه؟!

السائق: هو فى موظف بيشترى ياميش اليومين دول؟!

قشاط "بذعر": ما تقول حاجة يا حامد؟

حامد: أقول لك إيه؟.. أنا لو أعرف أنك شايل الحاجات دى فى الكيس ماكنتش مشيت معاك

قشاط: ليه يعنى؟!

حامد: الحاجات دى دخلت جدول المخدرات فى الأجزخانات