قطع الخط على متصل فاجأ الإبراشي بانتقاد السيسي

والإعلامي يرتبك

قطع برنامج "العاشرة مساءً" الخط على متصل من محافظة الإسكندرية ، حمّل الرئيس عبد الفتاح السيسي مسؤولية كل الأحوال المتردية في البلاد.
وقال المتصل في مداخلة مع الإعلامي وائل الإبراشي: "أنت كل يوم قاعد سهران بليل بتعالج مشاكل ، مشكلة خبز لسياحة لدولار لتعليم لصحة لمواصلات .. واضح أن فيه حالة عدم كفاءة في المسؤولين اللي بيديروا الأمور في البلد .. احنا لا عندنا وزراء ولا مجلس نواب .. احنا عندنا ريس .. احنا كل مشاكلنا متعلقة دايمًا بالراس الكبيرة .. مش ممكن أنا ألاقي بلد مشاكلها كل يوم بتتكرر .. احنا هنفضل لحد امتى نعاني من هذه المشاكل نتيجة عدم الكفاءة ".
وأضاف: "مجلس النواب من يوم ما جه لحد النهاردة أنا مشوفتوش عمل حاجة وعايز يوقف أنور السادات أو يحبس الصحفيين مع أنه المفروض منبر الحريات والدستور بيقول كدة .. الدستور دة مش هيحترم في يوم من الأيام؟ ".
وتابع: "الريس اللي احنا انتخبناه وقال (مصر هتبقى أحسن) .. أنا بقوله المشاكل دي هتتحل ازاي؟ دي عدم كفاءة ولازم يبقى فيه حل من الريس .. أنا مش هحمل وزير حاجة .. أنا كل ما بسمع البرامج بليل بلاقي بيتقال ( خطوات الرئيس سريعة والناس مش لاحقاه) .. أنا شايف أن دة كلام عايز مراجعة .. لا الريس هو المسؤول .. والناس النهاردة في الشارع كنت شايف المظاهرات الناس كلها محملة الريس المسؤولية لأنها متعرفش أسماء الوزراء".
وقاطعه الإبراشي قائلًا: "لا ماهو أصل الحكومة مهمتها الأساسية هي الامور الاقتصادية والمعيشية .. والرئيس مهامه أكبر .. يعني تحقق الكثير زي حماية الدولة وإقامة دولة المؤسسات وأيضًا المشاريع الكبرى .. أصل وزير تموين ووزير زراعة .. يعني ممكن يكون فيه بعض الكوارث لكن في النهاية الحكومة مسؤولة .. أصل أنا مش هقول أن أداء وزير الزراعة الرئيس هيكون مسؤول عنه يعني و وزير التموين اتخذ هذه الخطوة (تقليل الأرغفة) من منهجه .. لم يعد لأحد .. ممكن يكون رجع لرئيس الحكومة .. سامعني؟".. لكن المتصل لم يرد.
الفيديو: