مؤلف «كارثة طبيعية» يكشف كواليس الفكرة: «بدأت من صورة أبوين مصدومين بخمسة توائم»

كشف أحمد عاطف فياض مؤلف مسلسل «كارثة طبيعية» أن فكرة العمل لم تكن وليدة التحضير للمسلسل، بل تعود إلى سنوات سبقت كتابته لمسلسله السابق «بالطو»، موضحًا أن الشرارة بدأت حين صادف خبرًا صحفيًا عن سيدة شابة وضعت خمسة توائم في إحدى المحافظات.
وقال احمد عاطف فياض إن الصورة المرفقة بالخبر، والتي ظهر فيها الأب والأم يحملان أطفالهم، كانت اللحظة الحاسمة التي لفتت انتباهه، مضيفًا: «حسيت وش الأب والأم كأنه معجز جدًا رغم إنهم شباب… مفيش فرحة، نفس ملامح محمد سلام في نهاية الحلقة التالتة وهو شايل الأطفال ومصدوم».
وأضاف عاطف عبر حسابه الرسمي فيس بوك: «ناس كتير بتسألنى فكرة مسلسل «كارثة طبيعية» جت في دماغك ازاى وإمتى وناس تانية مستغربين الفكرة أو فاكرينها فانتازيا! هي الفكرة دى كانت عندى من قبل ما أكتب مسلسل بالطو أصلا ... وجاتلى الفكرة لما شوفت خبر بالصدفة على إحدى الصحف الالكترونية عن ولادة سيدة شابة لخمس توائم في إحدى المحافظات ... ولفت نظرى الصورة اللى محطوطة في الخبر للأب والأم وهما شايلين الأطفال، حسيت وش الأب والأم في الصورة كأنه معجز جدًا مع إنهم شباب.. مفيش فرحة على وشهم ( تقريبا نفس وش محمد سلام في نهاية الحلقة التالتة وهو شايل الأطفال ومصدوم )، استغربت كمان لما لقيت الكومنتات على الخبر ده كلها ناس مبهورة من العدد وعمالين يهزروا ويقولو في الكومنتات ايفيهات زى ايفيهات موظف السجل المدنى في المسلسل، ومفيش أي حد حتى دعا للأب والام ربنا يقويهم على الأقل ... لأ ده فيه ناس كانت كاتبة في الكومنتات حاولوا تعملولهم حجاب عشان مايتحسدوش ... اللى هو كمان الناس هتحسدهم.. فحسيت إن الناس مش حاسة خالص بيهم أو بالمشاكل اللى هتقابلهم بسبب العدد الكبير ده من الأطفال اللى اتفاجئوا بيه مرة واحدة».
وتابع: «ومن هنا الفكرة نورت في دماغى ... بدأت أعمل سيرش عن الموضوع أكتر لقيت التوائم المتعددة دى» حالة نادرة بس بتحصل كتير «.... تقريبا في كل محافظة في مصر فيه محمد وشروق ... ومحدش فينا حاسس بيهم ولا بوجودهم ولا بالمشاكل اللي بيمروا بيها، فيه محمد وشروق في الغربية ... ومحمد وشروق في بنى سويف وكفر الشيخ والبحر الأحمر وكل المحافظات ... لو عملتوا سيرش في اليوم السابع بس .. هتلاقوا حالات كتير جدًا.... ف فيه محمد وشروق في كل حتة تقريبًا وسطنا».
واختتم: «فمبسوط جدًا أن الناس بدأت تحس بمحمد وشروق في المسلسل ومتعاطفين معاهم وأتمنى كل الناس يتعاطفو بردو مع الحالات اللى زيهم في الحقيقة ... ومش شرط الحالات اللى زيهم يكونوا ناس خلفوا خمسة ولا سبعة أو ناس خلفوا أصلاً ... لا ممكن محمد وشروق يكونوا مرضى أو منكوبين أو حصلهم مشكلة كبيرة خارجة عن إرادتهم شقلبت حياتهم وضغطتهم ومحتاجين مساعدة وإهتمام مننا كمجتمع ... ولو مش هنساعدهم على الأقل نحس بيهم وبظروفهم».