خبر حقيقي.. مؤلف «كارثة طبيعية» يكشف سبب فكرة العمل

كشف أحمد عاطف فياض، مؤلف مسلسل «كارثة طبيعية»، عن كواليس فكرة العمل، وكيف جاءت إليه وما الذي ألهمه لكتابة هذه القصة.
وكتب أحمد عاطف فياض عبر حسابه على «فيس بوك»: «ناس كتير بتسألنى فكرة مسلسل»كارثة طبيعية«جت في دماغك ازاى وإمتى وناس تانية مستغربين الفكرة أو فاكرينها فانتازيا! هي الفكرة دى كانت عندى من قبل ما أكتب مسلسل بالطو أصلا ... وجاتلى الفكرة لما شوفت خبر بالصدفة على إحدى الصحف الالكترونية عن ولادة سيدة شابة لخمس توائم في إحدى المحافظات ... ولفت نظرى الصورة اللى محطوطة في الخبر للأب والأم وهما شايلين الأطفال».
تابع: «حسيت وش الأب والأم في الصورة كأنه معجز جدًا مع إنهم شباب.. مفيش فرحة على وشهم ( تقريبا نفس وش محمد سلام في نهاية الحلقة التالتة وهو شايل الأطفال ومصدوم )».
أوضح: «استغربت كمان لما لقيت الكومنتات على الخبر ده كلها ناس مبهورة من العدد وعمالين يهزروا ويقولو في الكومنتات ايفيهات زى ايفيهات موظف السجل المدنى في المسلسل، ومفيش أي حد حتى دعا للأب والام ربنا يقويهم على الأقل ... لأ ده فيه ناس كانت كاتبة في الكومنتات حاولوا تعملولهم حجاب عشان مايتحسدوش ... اللى هو كمان الناس هتحسدهم.. فحسيت إن الناس مش حاسة خالص بيهم أو بالمشاكل اللى هتقابلهم بسبب العدد الكبير ده من الأطفال اللى اتفاجئوا بيه مرة واحدة».
تابع: «ومن هنا الفكرة نورت في دماغى ... بدأت أعمل سيرش عن الموضوع أكتر لقيت التوائم المتعددة دى» حالة نادرة بس بتحصل كتير «.... تقريبا في كل محافظة في مصر فيه محمد وشروق ... ومحدش فينا حاسس بيهم ولا بوجودهم ولا بالمشاكل اللى بيمروا بيها».
أكد: «فيه محمد وشروق في الغربية ... ومحمد وشروق في بنى سويف وكفر الشيخ والبحر الأحمر وكل المحافظات ... لو عملتوا سيرش في اليوم السابع بس ..هتلاقوا حالات كتير جداً.... ف فيه محمد وشروق في كل حتة تقريباً وسطنا».
اختتم: «فمبسوط جداً أن الناس بدأت تحس بمحمد وشروق في المسلسل ومتعاطفين معاهم وأتمنى كل الناس يتعاطفو بردو مع الحالات اللى زيهم في الحقيقة ... ومش شرط الحالات اللى زيهم يكونوا ناس خلفوا خمسة ولا سبعة أو ناس خلفوا أصلاً ... لا ممكن محمد وشروق يكونوا مرضى أو منكوبين أو حصلهم مشكلة كبيرة خارجة عن إرادتهم شقلبت حياتهم وضغطتهم ومحتاجين مساعدة وإهتمام مننا كمجتمع ... ولو مش هنساعدهم على الأقل نحس بيهم وبظروفهم».
اقرأ أيضًا:
عودة الطفل المفقود واكتشاف طفل ثامن.. ملخص الحلقة 6 من «كارثة طبيعية» | المصري اليوم