بعد 27 عامًا.. قصة تنازل مطرب عن أغنيته ل عمرو دياب والمقابل «كبدة وسجق» (فيديو)

كشف الفنان طارق شريف مفاجأة تخص أغنية «الفراق ده نار» للفنان عمرو دياب.
وقال طارق شريف خلال لقائه مع الكاتب الصحفي والناقد الفني مصطفى حمدي في بودكاست «كاسيت المتخصص» في كواليس صناعة الأغنية المصرية والعربية: «في مرة رحت اسمع صوتي للشاعر عادل عمر ولقيته بيسمعني أغنية (الفراق ده نار) وكلماتها كانت بتقول: »أنت ياللي بحبك انت ياللي حبيبي.. انت ياللي طبيبي دوايا».
وأضاف: «الأغنية دي كانت بتاعتي قبل ما تتعرض على عمرو دياب وكانت متفصلة عليا وغنتها وقولتلهم حلوة أوي وسجلتها على شريط كاسيت وكانت لايقة عليا جدا وعملنا الأغنية وأدتها لفؤاد الشاعري مدير أعمال النجم حميد الشاعري واديته الشريط بتاعي وقالي أول ما يفضى حميد هديله الشريط ونشتغل».
وتابع: «أعدنا شهر اتنين تلاتة ورحتله الاستديو بعد كدا وكان عمرو دياب شغال معاه جوة في الأستوديو وفضلت أعد للساعة 5 الفجر، وشفت حميد الشاعري في البريك وندهت عليه وفكرته بالأغنية وسمعته جزء».
وتابع: «قعد يضحك وقالي قولها تاني كدة ودخلت الاستديو لقيت عمرو دياب وشغالة الأغنية بتاعتي بتقول (الفراق ده نار) بصيت وقولتله ايه دا دي اغنيتي ووقفت في ذهول وراحت مني الأغنية ومكنتش عملت وقتها تنازلات وقعدنا نضحك وقالولي أن شاء الله تلاقي حاجة أحلى وقعدت كلت معاهم ونسيت الأغنية».