مدير عام استوديو الأهرام: «الممثلون كانوا موجودين قبل الحريق ب24 ساعة» (نص التحقيقات)

تزامنًا مع محاكمة 4 عمال أمام محكمة جنح العمرانية في الجيزة، اليوم الأربعاء، بتهمة الإهمال الجسيم في أداء عملهم بما نتج عنه حريق استوديو الأهرام محل عملهم، حصلت «المصري اليوم» على نص أقوال مدير عام الاستديو، أشرف حسن، الذي كشف تفاصيل الحريق الذي نشبّ في شهر رمضان الماضي، أثناء تصوير مسلسل «المعلم»، بطولة الفنان مصطفى شعبان.
وإلى نص التحقيقات:
س: ما طبيعة عملك واختصاصك الوظيفي؟
ج: أنا مدير عام استوديو الأهرام.
س: منذ متى وأنت تباشر ذلك الاختصاص؟
ج: أنا مدير عام استديو الأهرام منذ عام تقريبًا.
س: وأين يقع استوديو الأهرام محل الواقعة تحديدًا؟
ج: في شارع خاتم المرسلين، الاتجاه القادم من ميدان الجيزة إلى مشعل- أمام شركة الشرقية للدخان.
س: ملك من استوديو الأهرام؟
ج: استوديو الأهرام جهة حكومية تابعة حاليًا للشركة القابضة للاستثمار في المجالات الثقافية والسينمائية.
س: ما حدود استوديو الأهرام؟
ج: استديو الأهرام يقع بشارع خاتم المرسلين الرئيسي، وعلى ناصية شارع جانبى متفرع من شارع خاتم المرسلين.
اسمه «ستوديو الأهرام»، والاستوديو الأربع حدود بتوعه متسورين، والاستوديو ليه مدخل رئيسي واحد من شارع «ستوديو الأهرام»، وليه مدخل تانى معمول للبضاعة من على شارع خاتم المرسلين، وحدود الاستديو كالتالي: الباب الرئيسي بتاع الاستديو أمامه الشارع الجانبي اللى اسمه استديو الأهرام، ودا شارع عرضه تقريبًا 6 متر وبيفصل ما بين شارع الهرم وشارع خاتم المرسلين، 2- الباب الخلفي اللى معمول للبضاعة بيطل على شارع خاتم المرسلين الرئيسي، 3- الناحية الموازية للباب الرئيسي للاستوديو حدود الاستديو فيها مع عمارات سكنية بيفصل بينها وبين الاستديو مسافة قصيرة يعنى تقريبًا 3 متر. 4- الناحية الموازية للباب الخلفي للاستوديو بيفصل بينها وبين الاستديو عمارات سكنية ملاصقة لسور الاستديو.
س: ما مساحة استوديو الأهرام؟
ج: مساحته كبيرة، بس معرفش أحددها.
س: ما طبيعة وأوصاف المباني المنشأة داخل الاستديو؟
ج: هى المباني اللي مبنية في الاستديو عبارة عن (1) 3 بلاتوهات؛ بلاتوهان مساحتهما تقريبًا 600 متر، والبلاتوه الثالث مساحته تقريبًا 300 متر، (ب) حارة خشبية واحدة مقدرش أحدد مساحتها، (ج) مبنى صغير من الطوب عبارة عن دور واحد، ودا مبنى إدارى فيه المكتب بتاعي، وكذا مكتب تاني بتوع الموظفين اللي في الاستديو.
س: اشرح لنا المقصود بمعنى كلمة «بلاتوه» و«حارة خشبية»؟
ج: البلاتوه دا عبارة عن مكان مبنى بالطوب والأسمنت، ومغلق ومكون من دور واحد بس، ودا بيتم استخدامه في تصوير الأفلام والمسلسلات والإعلانات عن طريق وضع الديكورات المناسبة للتصوير، وبعد الانتهاء من التصوير بيتم إزالة الديكور، أما الحارة فدي عبارة عن مساحة مفتوحة مش مغلقة ومبنى فيها من الخشب حارة شعبية بتستخدم أيضًا في التصوير.
س: أذكر لنا مكان تواجد المباني والمنشآت السابق وصفك لها بداخل الاستديو؟
ج: في وش الباب الرئيسي للاستوديو فيه جنينة مساحتها تقريبًا 40 مترا * 40 مترا، وبعد الجنينة دي فيه البلاتوهين الكبار على اليمين، وفى النص قدام الباب الرئيسي فيه البلاتوه الصغير، وعلى شمال الباب الرئيسي للاستوديو فيه الحارة الخشبية، ودى بتبص على شارع خاتم المرسلين الرئيسي، والمبنى الإدارى على شمال الباب الرئيسي للاستوديو بس قبل الحارة الخشبية.
س: ما طبيعة السور الموضوع على الاستديو؟
ج: هو سور مبنى من الطوب ارتفاعه تقريبا 3 متر ومتسور بيه الأربع حدود بتوع الاستديو.
س: وهل متوفر بالاستوديو أجهزة وأنظمة الإنذار والكشف عن الحرائق؟
ج: لا، الأجهزة دى مش موجودة بس موجود طفايات وحنفيات حريق في الاستديو كله.
س: كم عدد الموظفين العاملين بالاستوديو؟
ج: 28 موظفا تقريبًا، بالإضافة إلى 12 فرد أمن تقريبًا.
س: ما طبيعة الأعمال التي تمارس بداخل الاستديو؟
ج: اللي بيحصل إنه بتيجي شركات الإنتاج بتحجز بلاتوه أو الحارة الشعبية عشان تسجل فيه فيلما أو مسلسلًا أو إعلانًا، وبعدين بتجيب المعدات والأدوات بتاعتها وتركبها في البلاتوه أو الحارة الشعبية، وبعد ما يخلصه تسجيل بيشيلوا المعدات وبيمشوا.
س: ومن الذي يتردد على الاستديو؟
ج: الموظفون والممثلون وفرق التصوير اللى بييجوا عشان يسجلوا في البلاتوه أو الحارة الشعبية.
س: وما معلوماتك بشأن الواقعة محل التحقيق؟
ج: اللي حصل وأنا في بيتي جالي تليفون إن الاستديو فيه حريقة، فنزلت جري وروحت على الاستديو، لقيت الشرطة والمطافي موجودين، وفيه حريقة كبيرة في الاستديو والدنيا مقلوبة في الشارع، بس أنا معرفش إيه اللي حصل.
س: متى وأين حدث ذلك؟
ج: أنا جالي التليفون 2024/3/16 الساعة 1:00 صباحًا تقريبا، ولما وصلت الاستديو كانت الساعة 1:45 صباحًا تقريبا.
س: وما الحالة التي أبصرت عليها الاستديو محل الواقعة عند وصولك إليه؟
ج: أنا لقيت النار ماسكة جامد في الحارة الخشبية والباب الخلفي للاستوديو اللي ناحية شارع خاتم المرسلين، والحمد الله النار موصلتش للبلاتوهات وكانت ماسكة في الحارة الخشبية بس.
س: وكم نقطة بداية للنيران أبصرتها آنذاك، وما امتداد النيران؟
ج: معرفش أنا لقيت نار كتير ماسكة في الحارة الخشبية، ولقيت النار وصلة للعمارات اللي جنب الاستديو من شارع خاتم المرسلين.
س: ومن كان يتواجد بالاستوديو قبيل نشوب الحريق محل التحقيق؟
ج: كان موجود فردين أمن اللي: هم: محمد عباس، وأيمن سمير، وكان موجود الغفير عيد علواني، وكان موجود موظفين بس معرفش كام واحد.
س: وهل من حجوزات ل«البلاتو» أو الحارة الخشبية خلال الوقت الراهن؟
ج: هو حاليًا شركة سينيرجى للإنتاج الفني حاجزة الحارة الخشبية وبلاتوه رقم (1) عشان مسلسل رمضان اللي اسمه (المعلم)- بطولة: مصطفى شعبان.
س: ومن الذي يتردد على الاستديو لتسجيل ذلك العمل الفني؟
ج: ممثلو المسلسل وطاقم التصوير، وفيه راجل كبير غفير اسمه «عم عاطف» شركة الإنتاج جيباه عشان يحرس اللوكيشن.
س: وما مواعيد تردد سالفي الذكر؟
ج: طاقم التصوير والممثلين آخر مرة حضروا يصوره كانت قبل الحادث بيوم يوم 2024/3/15 وفضلوا في الأول شغالين في الحارة الخشبية لحد الساعة 9 بالليل تقريبًا، وبعديها كمله تصوير في بلاتوه (1) وعلى حوالي الساعة 12 بليل تقريبًا فركشوا التصوير ولموا جزءا من المعدات اللى معاهم وسابوا جزءا ثانيا عشان لما يكمله تصوير وبعديها مشيوا، واللى فضل موجود المفروض الغفير اللى الشركة جايباه اللي اسمه عم عاطف.
س: وما طبيعة المعدات والأدوات الموضوعة بالحارة الخشبية تحديدًا؟
ج: هى أصلًا زى ما قولت الحارة بتكون مبنية كلها من الخشب، وطاقم التصوير بيكون معاه الكاميرات والأدوات اللي بيستخدموها في التصوير، وكمان بيكون معاهم الديكورات بتاعت الأشكال اللى هما هيستخدموها في العمل الفني اللي هيصوروه، واللي أعرفه إن معظم الحاجات بتاعت الديكور دى بتكون مجرد أشكال ومش حاجات حقيقية.
س: وهل من بين تلك المعدات والأدوات ثمة مواد معجلة أو قابلة للاشتعال؟
ج: بصراحة معرفش، واللي أعرفه إن معظم الحاجات دى بتكون ديكورات.
س: متى تحديدًا غادر أفراد طاقم تصوير العمل الفني الآنف ذكرك له الاستديو محل الواقعة؟
ج: هو أنا مكنتش موجود عشان أقول الوقت بالضبط، بس لما سألت عرفت إنى هما مشيوا الساعة 12 بليل تقريبًا.
س: ومن كان يتواجد بالحارة الخشبية عقب مغادرة طاقم التمثيل له؟
ج : أنا مكنتش موجود، بس هو الطبيعي إنه ميكنش فيه حد موجود غير الغفير اللي الشركة جايباه اللي اسمه «عاطف»، وأفراد الأمن والغفير بتوع الاستديو عشان الحراسة.
س: ومن المنوط به والمختص بحراسة مسرح التصوير؟
ج: أفراد الأمن والغفير بتاع الاستديو بيحرس وكمان معظم الشركات بتجيب غفير تقعده في اللوكيشن عشان يحرسلها حاجتها.
س: وما سبب نشوب الحريق؟
ج: معرفش.
س: هل تشتبه جنائيا في نشوب الحريق؟
ج: معرفش، بس أعتقد إن الموضوع «قضاء وقدر».
س: وهل تسبب أحد بإهماله في نشوب الحريق؟
ج: معرفش.
س: وهل تتهم أحدًا بثمة اتهامات؟
ج: لا.