فرحها الشهر الجاي .. والدة ضحية حادث المعدية: «كنت حاسة وقولتلها متروحيش الشغل النهاردة» (فيديو)

شيع أهالي عزبة التفتيش في مركز أشمون بمحافظة المنوفية اليوم جثامين 6 من ضحايا حادث المعدية في محافظة الجيزة ، ومازال البحث مستمرًا عن جثامين 3 آخرين من المفقودين في حادث المعدية.
تقول والدة زينب عبدالعزيز: «بنتى زينت كانت طالعة لرزقها ولقمة عيشها، عشان تجهز نفسها، لأن فرحها الشهر الجاي، هي كبيرتي بتشتغل عشان تساعد أبوها على تربية أخواتها، أنا معايا 3 بنات».
وتبلغ زينب من العمر 17 سنة، وأغلب الضحايا في الحادث من الأطفال وبعضهم في الصف الأول الإعدادي، وكانوا عائدين من العمل في مزرعة دواجن.
وتضيف والدة زينب: «الله يرحمها زينب كانت بتشتغل عشان تساعدني وتساعد أبوها عروسة مخطوبة وحاجزين لها القاعة عشان فرحها».
وتقول والدة ضحية حادث حادث المعدية ل«المصري اليوم»: «الله يرحمها ويوسع في قبرها.. كله عشان لقمة العيش، كانت بتشتغل في جمع البيض في مزرعة فراخ، وأُجرتها 60 جنيه تصفي على 50 بعد ما تصرف 10 جنيه أكل، وكل يوم تطلع 7 الصبح ترجع المغرب».
وتوضح والدة زينب: «بنتى زينب طلعت من المدرسة من تالتة إعدادية وبدأت تشتغل من 3 شهور في المزرعة عشان تساعد أبوها، وأبوها بيشتغل عامل باليومية، بيشتغل يوم ويقعد 10، وأجرته 50 جنيه».
وأضافت والدة ضحية معدية الموت: «ما عرفتش أدفع مصاريف المدرسة، فوراحت تشتغل كانت تساعدني أنا وأبوها على تربية أخواتها».
وتقول أم زينب: «قولت لها ما تروحيش الشغل النهاردة، ولكن جه زمايلها بالعربية أخدوها وأنا كنت رايحة أجيب العيش من بره».
وتؤكد والدة ضحية حادث المعدية: «كنت حاسة بفراقها ما كنتش عايزاها تطلع بره، كنت حاسة بقلق عليها، وكنت عايزة أجري ورا العربية أرجعها، وما لحقتهاش».
وتقول أم زينب: «بقوا بيضحكوا عليا اخواتي ويقولوا لي دي عايشة، دي في المستشفى ودراعها مكسور، وما عرفتش بوفاتها إلا بعد المغرب».
وتضيف والدة زينب: «سعيد ابن أختى اللى حيلتها اللى خلفته بعد 14 سنة جواز، هو كمان مات، كان بيقول لأمه أروح أشتغل يا أمي أساعد أبويا أبويا عيان، وكان مستكبر أخته تطلع تشتغل عشان مخطوبة.. والإتنين ماتوا الله يرحمهم».
وسقطت سيارة ربع نقل في نهر النيل من أعلي المعدية في مركز شبين القناطر في محافظة الجيزة، وهي تقل 23 من العاملين في مزرعة دواجن في الجيزة أثناء عودتهم إلى منازلهم في محافظة المنوفية.
وتم استخراج جثامين 6 ضحايا الحادث، ويجري البحث عن جثامين 3 مفقودين، في حين تم انقاذ 14 آخرين أمس الإثنين.
وشيع أهالى القرية المنكوبة اليوم جثامين 6 من ضحايا حادث المعدية المتوفين وهم: «هاجر عبدالصمد» و«دعاء نبيل عبدالرسول» و«محمد صبرى» و«زياد أحمد حسن» و«زينب عبدالعزيز» و«سعيد الطناني».
اقرأ أيضًا عن أخبار حادث معدية الموت
«طلع يشتغل عشان محيلتناش حاجة»..والدة ضحية حادث المعدية: «خلفته بعد 14 سنة جواز» (فيديو)
لحظة استخراج جثة جديدة من السيارة الغارقة وانهيار أسر الضحايا (فيديو)
النيابة العامة تحقق في غرق سيارة نقل بمعدية منشأة القناطر
أول صور لحادث سقوط سيارة محملة بالعمال من أعلى معدية القطا في منشأة القناطر
«شهداء لقمة العيش».. أهالي طليا بأشمون يشيعون جثماني ضحيتي معدية منشأة القناطر (صور)
أهالي طليا يحتشدون في المنوفيه أمام مرسى معديه القطا في انتظار البحث عن ذويهم
خال ضحيتي حادث معدية منشأة القناطر: «ولاد إخواتي ماتوا علشان ضيقة الحال.. وقلوبنا محروقة» (صور)