بدأت نيابة ثان المنصورة في محافظة الدقهلية، التحقيق في واقعة قيام رجل يصفع طفل صغير في إحدى سلاسل السوبر ماركت شهير بالمنصورة، وطالبت النيابة بتحريات المباحث حول الواقعة وملابساتها، وتحديد هوية مرتكب الواقعة، وكذلك الاستعلام من إدارة المرور في الدقهلية، عن رقم السيارة المقدم مع البلاغ. وكشفت تحريات المباحث أن الطفل يدعى سامح محمد خليل، 8 سنوات ومقيم دائرة قسم ثانى المنصورة، وأن والده يعمل سائس جراج خاص ببرج مجاور للسوبر ماركت. وكان نشطاء على مواقع التواصل الاجتماعى تداولوا فيديو اعتداء رجل على طفل لايتعدى عمره 8 سنوات بإحدى سلاسل السوبر ماركت الشهيرة في مدينة المنصورة. وظهر بالفيديو «رجل يتفقد المشتريات ويقترب منه طفل صغير يتحدث معه لمدة ثوانى قبل أن يقوم الرجل بصفع الطفل بالقلم على وجهه فيسقط على الأرض من شدة الصفعة». وسادت حالة من الغضب بين رواد مواقع التواصل الإجتماعى بسبب الواقعة مطالبين بحق الطفل وتحديد شخصية الرجل الذي ضربه واصفين الواقعة بالوحشية. وتفاعل خط نجدة الطفل، والمركز القومى للأمومة والطفولة مع الواقعة وقاموا بتقديم بلاغ في النيابة العامة بالواقعة. وأكد شهود عيان بالسوبر ماركت «أن الطفل سامح تقدم بمنتهى الأدب من الرجل مرتكب الواقعة وقال له لو سمحت يا عمو تعالى شيل عربيتك علشان قافة باب الجراج في ناس عايزة تخرج فقال له «مش هأشيلها»، فكرر الولد كلامه قائلا: «مينفعش ياعمو باب الجراج مقفول بالعربية»، فهدده الرجل قائلا: «هتمشى ولا أضربك»، فرد الطفل خائفا: «إنت قلت مش هتتأخر وبقالك نصف ساعة»، فقام الرجل بصفعه بقوة فسقط الطفل وارتطم رأسه بالأرض. وأضاف شهود العيان: «حاولنا التدخل وقلنا له حرام عليك ده عيل صغير فوجه لنا السباب جميعا وقال: «أنا حر وهأطلب لهم ولكم البوليس أنا وهأربيكم كلكم». وتابعوا بعد فترة قصيرة حضر والد الطفل، وهو معلوم لنا جميعا، وشاهد الكاميرات وانهار من هول الصدمة. ومن جانبه، قال محمد خليل، والد الطفل سامح: «أنا كنت عند الدكتور بكشف على بنتى ولقيت اتصال من سامح عن طريق تليفون واحد صاحبي ولقيته بيبكي ويقولي واحد ضربنى يا بابا فقلت لصاحبى يروح يشوف ايه اللى حصل لحد ما ارجع فطلبنى بعدها وقالى انه قابل الرجل ومعاه واحد وقاله محصلش حاجة واللى معاه قاله ده رجل كبير ومش معقول هيضرب طفل صغير» وأضاف متأثرا: «بعد لما رجعت البيت لقيت ابني سامح نايم وتعبان وشكلهه حزين ومكسور فسألته مالك قالي الراجل ضربني جامد أوي يا بابا ولقيت أصابع الرجل معلمه في وشه فاتجننت من المنظر وروحت السوبر ماركت تانى يوم أشوف الكاميرات ولقيت الكل متأثر من الموقف وأول ما شفت الفيديو انهارت لأن محدش طبيعى يضرب طفل بالقسوة دى فعملت استغاثة ومحضر علشان أعرف مين الشخص ده وآخد حق ابني». وتابع منفعلا: «أنا عايز حق ابني اللي اتهان وانضرب واتكسر بالشكل ده بدون ذنب». وحكى الطفل سامح محمد خليل ل"المصري اليوم"، ما حدث قائلا: «إحنا عايشين في حجرة بالجراج، وبابا راح يكشف على أختى وقاللي خلي بالك من الجراج علشان السكان فخرجت قعدت أمام الجراج وبعدين وصل الرجل ده ومعاه واحد تاني بعربية ووقف أمام باب الجراج فقلت له مش هينفع تقف هنا ده باب للجراج فقال لى خمس دقائق هأجيب حاجة وأخرج على طول، فقلت له ماشىوبعدين لقيته اتأخر نصف ساعة». وأضاف: «بعد شوية لقيت حد من السكان عايز يدخل الجراج فدخلت السوبر ماركت أقوله ييجى يشيل العربية من أمام باب الجراج علشان الناس عايزة تدخل فرفض وقالى امشى من هنا بدل ما أضربك، فقلت له «حضرتك قلت 5 دقايق وفات نصف ساعة ولو سمحت يا عمو شيلها علشان الناس عايزة تدخل فضربنى على وشي جامد جدا، ووقعت على الأرض ورأسي اتخبطت في الأرض ودوخت وكمان إزازة الزيت وقعت على من على الرف، فخرجت جري أكلم بابا أقوله». وتابع قائلا: «أنا عايز حقي من اللي ضربني لأنه ضربني علشان أنا صغير لكن لو كنت كبير أو معايا حد كبير مكنش يقدر يضربنى».
