وطنى الأكبر

وطنى حبيبى الوطن الأكبر      يوم ورا يوم أوجاعه بتكتر
وانكساراته مالية حياته            لما القلب عشانه اتْحَسّر
كل ده برضه لسه بنسأل          مش عارفين مين فينا الأشطر
إحنا وللا يهود صهيون           اللى بيقتل ولا بيفكر
روح أطفالنا بتزعق فينا          ليه يا جماعة سلاحكو اتأخر؟
لو مطلعش ف وقت الأزمة      امتى قولوا لنا بس هيظهر؟
طفلة وكانت جوه الفصل         فجأة رماها سلاح الغدر
مدفع.. طلقة وللا صاروخ       شظية بتقتل ساعة الفجر
تقتل طفلة تقتل شيخ               تقتل شاب ف عز الضهر
شايل وطنه فوق أكتافه           عمره ما قال ارتاح م القهر
آه يا صهاينة جنونكم زاد          حرق الأرض وقتل الزهر
من إرهابكم خلص الصبر         من عدوانكم نطق الصخر
وبْجُبن وخِسَّة وقِلّة أصل          سرقوا الأرض وغاب النصر
لكن بُكره هيجى النور              يمحى ظلام الجُور والشر
دم شهيدنا هيروى ترابنا           وهَيغلب عَزمُه موج البحر
روح شهداءنا بتزرع فينا          حب الحق ونار الثأر
لما الأرض هترجع حرة           والأوطان بإدينا تتحرر
بس ساعتها نقول ونردد           وطنى حبيبى الوطن الأكبر
عيد على حميدة
محرر صحفى وإعلامى - طنطا