تعليقات ساخرة للنشطاء للتعامل مع عربيتك بعد زيادة سعر البنزين

تداول نشطاء مواقع التواصل الاجتماعي، اليوم، عدة تعليقات ساخرة لكيفية تعامل الشباب مع زيادة سعر البنزين وكانت النصائح كالتالي: انسى الدريفيت والتخميس كانت ذكريات.. انسى الشد والحرق على الغيارات.. بطل عربيتك وانت بتشترى حاجة حتى لو 20 ثانية.. متشغلش التكييف، بطل العربية في إشارات المرور، بلاش تسافر بالعربية، أحسن تقضيها مواصلات.
لو معاك عربية أكتر من 1600 CC بيعها، ولو معاك عربية أكتر من 1000 CC بيعها برضه، ولو السكة زحمة اركن على جنب لغاية ما تسلك، خلى معاك حبل في العربية عشان حتحتاجه كتير.. التيربو والديفيل وفلتر الهواء الرياضى ده تنزل تشيله أو تولع فيه.. حاول تسترزق في السكة ركب واحد من الطريق وخد اللى فيه النصيب، الشد مع عربيات في السكة دى بقت فقرة الذكريات انساها، ابوس ايدك متشغلش التكييف، اللى معاه جيب أو عربية دفع رباعى ده راجل يستحق الصدقة دلوقتى متنساهوش نعمل جمعية ونلم ليه مع بعضينا.. عصر الشهامة انزل أوصلك يا حاج انتهى.. راجع نفسك قبل ما تتشاهم، لو أبوك قالك انزل وصل اختك أو انزل هاتلى حاجة اعمل نفسك ميت.. القيادة فوق 100 كم/ساعة إسراف وتبذير ربنا حيحاسبك عليه، متشغلش أم التكييف نهائيًا.. اللى معاه عربية دلوقتى يستحق أي حسنة عاملوه معاملة الفقير، المشوار اللى أكتر من 20 دقيقة قيادة اركن العربية أحسن.. لو ساكن بعيد عن شغلك يا تسيب شغلك يا تعزل أوفرلك صدقنى، لو ساكن قريب من شغلك قضيها مشى المشى رياضة، أي حاجة بتزود في حرق البنزين صلحها من دلوقتى أحسن لك، اتعلم تسوق موتوسيكل أو عجلة قريب، احسنلك اشترى حمار أوفر، حاول تصاحب سواق ميكروباص وانسى ستايلك دلوقتى نهائى، متشغلش التكييف عشان خاطر صحتك تاخد برد إنت وأولادك، بدل ما تروح لواحد صاحبك بعلبة شيكولاتة خدله معاك جركن بنزين..
أقولك الخلاصة بيع عربيتك أحسن لك.