يومها قلبي أكلني عليهم.. بدون سبب.. طبيعي ما نعرفش حاجة.. دي أسرار عسكرية.. وإحنا في حرب واتعودنا في شغلنا في المينا لا نتكلم ولا نسأل في اللي مالناش فيه.. ودمياط والناصر بيطلعوا البحر كتير لحاجات ما لناش حق نعرفها.. وركبني القلق زي ولادي لما يتأخروا ما تغمضليش عين إلا برجوعهم اتشاغلت بنصبة الشاي.. دي نفسها.. كنت صبي واشتريتها من ولاد معلمي الله يرحمه ولقيته هوكمان قاعد وناس كتير حوالينا وما حدش قادر ينكش الموضوع. في نص الليل مشي خبر من قبطان سفينة يوناني أذاعته ال بي بي سي سمع أن الطيران الإسرائيلي بيطارد مدمرتين بعد ما قصفوا رمانة وبالوظة بسيناء اللي احتلوها من سنتين. واترجت الميناء .. عنينا علي البحر ونقول يارب .. وهلت دمياط ترقص غندورة علي الموج والفلندرة بترفرف زي قلوبنا .. علم مصر رفيع طوله 30 م ترفعه وهي منتصرة ما احنا خبرة برضه وطول عمرنا في حروب ..الناس اتهبلت ..فرحة فرحة فرحة .. زعيق وصويت وبهجة شكر.. الله أكبر ..وضباط البحرية وعساكرها في حضن الناس .. والسفن الأجنبي قبل المصري بتطلق صفارات التحية زغاريت للسما صحت بيوت إسكندرية والزغاريت في البلكونات والأسطح .. وأول ما السيد قائد البحرية هناهم (الفريق محمود عبد الرحمن فهمي) البطل اللي قلق منام الإسرائيليين طول حرب الاستنزاف .. شيلنا الأبطال ولفينا المينا .. حرب الاستنزاف دي مدرسة كبيرة وأساس نصر 1973. • وهرب لزبائنه حرجا من بريق دموعي..
حكايات من حرب الاستنزاف(67 - 1970) كتاب الجمهورية - رئيس التحرير وليد البلاسي