«حدوتة قبل النوم».. «الفراشة المغرورة»

لكل أم تجد صعوبة في نوم أطفالها، إليكِ حلا سحريًا للأخذ بيد طفلك إلى عالم الأحلام والنوم الهاديء.. «شيماء عبدالعال» تقدم مجموعة قصص يومية تساعدك على ذلك:
حدوتة النهاردة ... «الفراشة المغرورة»
كان ياما كان كان في زمان فراشة جميلة وجناحتها الوانها زاهية، كانت الفراشة مغرورة جدا بنفسها عشان جناحتها الملونة وطول اليوم تتنقل بين الازهار وتتباهي بجمالها و بجناحتها.
وفي يوم من الايام وهي واقفه علي زهرة من الازهار جت وقفت جمبها نحلة، بصت النحلة للفراشة وابتسمت لها وقالتلها ازيك يا فراشة يا جميلة ممكن نبقي اصحاب، ردت عليها الفراشة بطريقه سخيفة وقالتلها لا طبعا مش ممكن نبقي اصحاب، انا فراشة جميلة وجناحتي ملونة بالاحمر والاصفر والاخضر والاسود والموف لكن انتي ياعيني لونك اصفر و اسود بس.
انا كل الناس اللي يشوفني بيتجنن عليا وعلي الواني و يقعدوا يقولوا سبحان الله، لكن انتي بقي بيقولوا عليكي ايه ههههههه و قعدت تضحك و طارت لزهرة تانية، النحلة وقفت مضايقة شوية وبعدين قالت لنفسها ايه الفراشة المغرورة دي انا لازم اعلمها درس متنسهوش ويخليها تبطل غرور.
طارت وراها النحلة ووقفت جمبها وقالتلها علي فكرة شكلي ده انا مليش دخل بيه لان مش انا اللي خلقت نفسي ربنا اللي خلقني كدة، لكن انتي بقي دورك ايه، ايه الوظيفة اللي بتعمليها عشان الناس تحبك طول اليوم بتقعدي تتنقلي من زهرة للتانية وبس، لكن انا طول اليوم بفضل اتنقل بين الزهور و اجمع رحيق الزهور عشان انتج العسل الابيض اللي فيه شفاء للناس عشان كدة لو سألتي الناس هتلاقيهم بيحبوني انا اكتر لان العسل بتاعي بيشفيهم من الامراض، لكن انتي الناس بتتفرج علي الوانك الجميلة وبس وشوية نور ممكن يحرقوكي وتموتي، انتي ليه مغرورة كدة، طارت النحلة لبعيد وفضلت الفراشة تفكر في الكلام اللي النحلة قالتهولها وحست ان النحلة فعلا عندها حق في كلامها فقررت تروح للنحلة وتعتذر لها ولسه هتطير ناحيتها لاقت ولد صغير جايب شبكة وعايز يصطادها ويلعب بيها هو و اصحابه، حاولت تهرب منه معرفتش وفعلا اخدها في الشبكة بتاعته قعدت الفراشة تصرخ بصوت عالي الحقوني حد ينقذني، الحقوني.
سمعتها النحلة وطارت بسرعه ناحية صوتها قالتلها الفراشة الحقيني خرجيني من الشبكة دي الولد ده عجبتوا الواني واصطادني عشان يلعب بيا هو واصحابه قالتلها متخافيش، ندهت النحلة بسرعه علي مجموعه من النحل اصحابها وطاروا ناحية الولد و قعدوا يزنوا بصوت عالي ويلفوا حواليه الولد خاف منهم احسن يقرصوه ورمي الشبكة علي الارض وجري بسرعه عشان يهرب منهم، النحله واصحابها ساعدوا الفراشة وطلعوها من الشبكة الفراشة شكرتهم جدا انهم انقذوا حياتها واعتذرت للنحلة علي الرد السخيف بتاعها و قالتلها الولد اصطادني وانا كنت لسه هطير عشان اجيلك اعتذر لك انتي عندك حق انا هبطل غرور وعايزة نبقي اصحاب انا و انتي وفعلا الفراشة والنحلة بقوا اصحاب جدا.