إحم إحم

الشاطرة (تطبخ) برجل حمار !

احكيلي يا شهرزاد عن أحوال البلاد والعباد، راجع من رحلة صيد في الفيوم، كان يوم صعب ولا ألف يوم، الريح فضلت تعصف والسماء كانت ملبدة بالغيوم، ومارجعتش من الرحلة غير بهموم فوق الهموم، رغم أني لا قريت جرايد ولا اتفرجت علي التليفزيون المشئوم، عايز حكاوي تفرفشني، وتخرجني من المود ده وتنعشني.
- هيء هيء بتقول كنت في الفيوم يا مولاي؟
- فيه إيه يا شهرزاد ضحتك بتوغوشني!
- متأخذنيش يا مولاي، انا كنت ساكتة لكن معاليك بتنكشني، أصل الكلام اليومين دول كان كتير عن لحمة جاية من الفيوم بيقولوا إنها لحمة حمير!
- لحمة حمييير؟ ايه الكلام ده اللي يخلي العقل يطير، يكونش قصدك لحمة خنزير؟
- حمير يا مولاي حمير، زي مبؤلك كده يا كبير، هو سعادتك أكلت في الفيوم كتير؟
- بصراحة اليوم كان صعب وعسير، وعصافير بطني كانت من الجوع هتطير، رحت ميلت علي كفتجي شهير وأكلت من عنده خمس ساندويتشات شاورمة من الحجم الكبير وتلاتة كفتة وسط واتنين حواوشي صغير وحبست بكوباية شاي وقزازة عصير، يكونش فيه حاجة كمان اتقالت عن الشاي والعصير، ما هو مبقاش فيه حاجة مضمونة في بلد مفيهاش ضمير.
- ويا تري الكبابجي الشهير عرف إنك شهريار الأمير؟
- مانتي عارفة انا في التنكر خبير، واللي يشوفني لا يعرفني أمير ولا غفير!
- وعلي كده كان فيه زحمة قدام الكاشير؟
- طوابير يا بنتي طوابير، وييجي ولا ألف زبون بين الأول والأخير.
- ربنا يستر يا مولاي وتعدي الأكلة دي علي خير!
- ازاي تعدي علي خير وانا من ساعة ما رجعت كاتم في قلبي سر خطير!
- فضفض يا مولاي، سرك في بير!
- بصراحة يا شهر حاسس ان شعر جسمي بقي غزير، ومناخيري كبرت أهي ووداني تنفع عش عصافير، معندكيش سيرة تانية غير سيرة الحمار؟ خلاص بقيتي تستسهلي التكرار ولا تكونشي نضبت الأفكار؟
- فشر يا مولاي طول عمري شاطرة والشاطرة تطبخ قصدي تغزل برجل حمار! طيب بلاش حكاية لحمة الحمير واسمع بقي حكاية الست الغندورة جولدا مائير؟
- جولدا مائير؟ أعوذ بالله.
- تصور حطوا صورة السفاحة جولدا مائير مع صور الستات الأكبر تأثير؟
- ده كلام خطير، محتاج تفسير، بالراحة كده وفهميني، بلاش كل شوية تخضيني.
- كان فيه زمان قرية فرعونية استضافت معرض للصور الفوتوغرافية، المعرض كان واسع وكبير، مليان أغاني وتصاوير، وفي وسطه متربعة صورة الحيزبون جولدا مائير!
- جولدا مائير إللي كانت رئيسة وزراء اسرائيل؟ أنا البرج اللي فاضل قرب يطير، أقولك، تعالي ناخد رست أنا عازمك علي عسل وفطير
- ولما انت تاكل فطير وانا اكل فطير اومال مين ياكل لحم الحمير؟
- حالا ابعت اي غفير جري علي الكبابجي الشهير يجبلنا الأكل بدون تأخير.
(وهنا جاء الكباب مع السلطات فالتزمت شهرزاد بالسكات وتركت نصيبها لشهريارالذي اصيب برعشة وشحار، وغلبه النوم بعد أن دخل في نوبة تهييس وزغللة وترفيص)!