شائعة تغضب أكرم حسني بسبب "الأوضة الضلمة"

نشر الفنان أكرم حسني عبر صفحته الشخصية على موقع التواصل الاجتماعي فيس بوك، توضيحًا، حيث كتب قائلا "رجاء من السادة الصحفيين المحترمين قبل ما ينشروا أي أخبار يحاولوا يتحروا الدقة قبل ما ينشروا.. للأسف انتشرت مؤخرا أخبار غير صحيحة تماما عن فيلم الأوضة الضلمة الصغيرة بتقول إن أكتر من سيناريست رفض يشتغل علي سيناريو الفيلم بسبب تدخلات المخرج محمد سامي وده محصلش بأي شكل من الأشكال".
أضاف قائلا "أولا: محمد سامي مخرج كبير ومحترم وأعماله هي اللي بتتكلم عنه وراجل بيحب شغله وبيهتم بكل تفاصيله، ده غير أن فكرة الفيلم فكرته ف بطبيعة الحال لازم يقعد مع السيناريست عشان يشرح له تفاصيل الفيلم و الشخصيات وده في صميم شغله كمخرج"
وأردف ثانيا: "تم ترشيح السيناريست هشام هلال من المنتج وليد منصور وهشام قعد معانا و سامي شرح له الفكرة، وكنا بنقعد جلسات عمل كان سامي بيتعامل فيها بمنتهي الاحترام والاحترافية و دي حاجة أنا أشهد عليها".
واستدرك قائلا ثالثا: "لما اختلفنا مع هشام هلال ( كسيناريست ) لأني علي المستوي الشخصي مشفتش منه أي حاجة وحشة اعتذرنا له بمنتهي الذوق و الاحترام من خلال المنتج، وسامي رشح السينارست المحترم كريم حسن بشير، اللي خلص لنا السيناريو في زمن قياسي وبمنتهي الاحترافية".
واختتم رابعا وأخيرًا: "الشغل ده رزق ومش مفروض أبدا لما نختلف فيه نتكلم عن بعض وحش وندعي حاجات محصلتش.. أنا بقول الكلام ده إحقاقا للحق وعشان تبقي الصورة واضحة قدام السادة الصحفيين عشان تبقي قدامهم الصورة كاملة.. دعواتكم لينا عشان نقدم لكم عمل يليق بيكم ويحترم دماغكم ويسعدكم لأننا بنعمل شغلنا بمنتهي الحب وآسف للإطالة".