أرسل لى عدد غير قليل من البنات الى زى الفل، الى تتراوح أعمارهم ما بين 27 إلى 35 سنة، الى تقول لى إن عمرها ما اتقدم لها عريس عدل، والى تقول لى إنه أكتر الى بقوا يتقدموا لها دلوقتى متجوزين أو مطلقين، والى تشكى لى إنه ما بيجيلهاش غير (عاهات) المجتمع، والى كاتمة فى قلبها وساكتة ومش قادرة تقول إنه مابيجيلهاش عرسان من أساسه!!!!. وطبعا البنت من دول أول ما تعدى ال 25 يبدأ بقى (النزناز) يشتغل، هى ماتجوزتش ليه؟، هى قاعده لغاية دلوقتى بتعمل إيه؟,هى عيبها إيه؟، ياترى هى الى بتتشرط ولا محدش بيجيلها؟، وهلم جر من الأسئلة والنظرات والتلميحات المباشرة وغير المباشرة، لغاية ما البنت تشك فى نفسها بجد، وتبدأ تاخد وتدى مع نفسها لغاية ما تتجنن ياعيني...هو أنا فيا إيه غلط؟، فى إيه ممكن يتعمل أنا معملتوش؟، ازاى أخلص من إحساس إن فى حد بيجرى ورايا ده، وإنى لازم أتجوز النهاردة قبل بكرة؟. وإلى كل البنات دى بأقول: أنا عارفة ومتأكدة إنك ممكن تكونى متعلمة كويس جدا، واحتمال تكونى بتشتغلى شغلانة محترمة، وأهلك ناس كويسين، وشكلك مقبول إن لم تكونى جميلة، وبالرغم من كل ده بتعانى من المشكلة دى، لأنه غالبا يا حبيبتى العيب مش فيكى، دى مشكلة مجتمع كامل، بلد بحالها، سياسة متخلفة، اقتصاد فاسد، بطالة متفشية، جو ملىء بالإحباط وخيبة الأمل، وكل ده للأسف (عك) على دماغك انتى فى الآخر، انتى والى زيك من بنات وشابات هذا الجيل، ويمكن الجيل الى قبله كمان، عشان كده عايزاكى تخفى من على نفسك عبء إنك انتى الى غلطانه، أو انك (معيوبه) كما يقذفك البعض منهم لله. لكن عشان نكون عمليين وواقعيين، تعالى نفكر مع بعض شوية، فى 3 أنواع من البنات هى الى بتكون سبب فى عدم عثورها على الشخص المناسب، لو انتى واحده منهم يبقى ياريت تاخدى بالك، و تنتبهى لتصرفاتك الى ممكن تكون هى الى عاملة فيكى كل ده: 1) البنت عالية المعايير: البنوته دى واحدة عارفه إمكانياتها، وفاهمة وضعها كويس، وعارفة كمان هى عايزه تتجوز مين بالضبط، محددة مواصفاته، وعارفه هى عايزة شكله إيه تماما، عشان كده هى طول الوقت بتدور على الشخص الى فيه المواصفات دى بالضبط، وبحذافيرها، بدون أى مرونة أو تنازلات، يعنى هى عايزه واحد 10 على 10 من أحلامها، 9 من 10 لأ ما ينفعش. لو كنتى من النوع ده، عايزه أقولك برافو عليكى انك عندك رؤية وتصور، وفاهمة انتى عايزه واحد شكله ايه، لأنك بكده هاتوفرى على نفسك تجارب كتير فاشلة، لكن خدى بالك عشان الموضوع لما بيزيد عن حده بينقلب لضده، لازم تعرفى انك مش هاتلاقى (السوبر مان) ده الى فيه 100% من مواصفاتك، لأنه للأسف مفيش عريس تفصيل، الموديلات المتاحة كلها جاهزة، وبالتالى لو لقيتى واحد فيه 70_80% من المواصفات الى انتى عايزاها، يبقى ماتتردديش وتوكلى على الله فورا، لأنك لو رفضتيه هاتبقى بكده ضيعتى أفضل ما يمكن بالنسبه لك. على فكره الكلام ده مش كلامى، ولا رأى شخصى افتكسته من دماغى، لأ ده كلام المستشارين الأسريين بتوع أمريكا نفسهم، لأنهم عملوا أبحاث وإحصائيات حول الموضوع ده، و لقوا إنه مش ممكن نلاقى شخص فيه أكتر من 80% من أحلامنا على أرض الواقع، فبلاش تضيعى الشخص ده، وتضيعى وقتك فى انتظار وهم أو سراب. 2) البنت التى بلا معايير: البنوته دى بقى عكس الأولانيه تماما، دى مش عارفة هى بتحب إيه، عايزة إيه، بتحلم براجل شكله ايه، البنت دى مقتنعه إنه ضل راجل ولا ضل حيطه، والمطلوب راجل والسلام، اعتقادا منها إنها بكده بتسهل على نفسها، وبتكتر من الخيارات المتاحة أدامها. والنتيجة بتكون انها (بتلم) حواليها ناس دون المستوى، أو ناس عندهم مشاكل دايما، لأن لسان حالها بيقول (أنا راضية بأى حد وبأى وضع) ، وفعلا بتلاقى نفسها دايما مضطرة تختار أحسن الوحشين. عشان كده لازم تعرفى إنه فى حد أدنى من المعايير ماتتنازليش عنه، يعنى مطلوب من حضرتك انك تقعدى بينك وبين نفسك كده وتحددى على الأقل 5 مواصفات لشريك حياتك، مش اقل من كده، فكرى فى أكتر 5 حاجات بتحبيها أو بتتمنيها، ولا تسمحى لأى واحد مافيهوش تلاته من الخمسة دول إنه يقرب منك، ماتفضليش فاتحة الباب كده لكل من هب ودب إنه يدخل حياتك ويجرب حظه معاكى، ده إهدار لمشاعرك ووقتك، وسمعتك إحيانا، لأنه إحنا فى مجتمع مابيرحمش، وهاتلاقى الى يقولك دى كل يوم والتانى مع واحد شكل. 3) البنت (الطاردة) للعرسان: دى بقى البنت الى بتشتكى إنه مفيش حد بيتقدم لها، ودى ممكن يكون لسبب من السببين: الأول: إنها تكون بتدى دائما انطباع الاستغناء، يعنى ممكن تكون بتشتغل، ليها دخلها، عايشة حياتها ، عندها عربيتها ويمكن شقتها كمان، وطول الوقت بتفصح عن انها مش ناقصها حاجة، ومش منتظرة حاجه من حد، عايزة أقول لك معلومة مهمة، وهى ان الراجل دايما يحب انه يكون له ضرورة وأهمية ودور فى حياة الست الى هايرتبط بيها، وممكن جدا يكون حواليكى ناس بتفكر فيكى لكن خايفة تقرب منك، عشان مش حاسين انهم ليهم لازمة فى حياتك. لو الوضع كده ياريت تخففى من استعراضك لإمكانياتك شوية، بسطى الأمور أكتر، عشان ماتكونيش بتدى انطباع انك هاترفضى أى حد بيجيلك لأنك مش محتاجاه، ولو حتى معنويا. السبب التانى: إنك تكونى (الشخص الغلط فى المكان الغلط)، بيقولوا إن البنت زى الفستان، لو فستان سهرة محطوط فى محل كاجوال محدش هايشتريه، ولو فستان كاجوال محطوط فى محل سواريه برضه محدش هايشتريه، يعنى راجعى البيئة والمجتمع والوسط الى انتى حاطه نفسك فيه، لأنه ممكن جدا مشكلتك تتحل لو تواجدتى فى المكان المناسب، المكان ده ممكن يكون شغل لو مكنتيش بتشتغلى، أو شغل جديد لو مستوى الناس مختلف عنك فى مكان شغلك، أو نادى، أو مسجد، أو مكان دراسة، أو أى مكان تحسى أنه شبهك وأن الناس الى فيه زيك، وممكن تلاقى فيهم نفس مستواكى. حاجه أخيره عايزة أقولها عشان البنات تطمن، يا حبيبتى كونى متأكدة إنه (ما أصابك لم يكن ليخطئك، وما أخطأك لم يكن ليصيبك)، اطمنى محدش بيروح عليه رزقه، ومحدش بياخد نصيب حد، وكلنا ماشيين فى أقدار مرسومة لينا من قبل مانتولد، يعنى اعملى الى عليكى فى انك تحافظى على نفسك، وادعى ربنا دائما وابدا انه يزقك الزوج الصالح _ وده شىء أساسى لا تغفليه أبدا_ وسيبى الباقى على الله، وخليكى دايما متأكدة انك كده أحسن ألف مرة من البنت الى بتتجوز أى جوازه هربا من العنوسة، وبتكون النتيجة عيشة نكد، وأطفال تعساء، ومشاكل بلا حصر، صدقينى انتى أحسن بكتير، وعلى رأى عمكو (صلاح جاهين)....ماتفتكروش يا بنات إن الجواز راحة. للتواصل مع د. هبه يس و افتح قلبك: [email protected]
