كشف الفنان أحمد عبد الوهاب، عن دوره في مسلسل "الحشاشين" وسبب خوفه من أداء الدور في بداية الأمر قائلاً : "أنا مش بعرف أعمل "اوديشن" وبأحس أني محتاج أذاكر وأحضر". وأضاف خلال لقاء عبر برنامج "كلمة أخيرة" الذي تقدمه الإعلامية لميس الحديدي على شاشة ON: "لما كلموني أعمل ده ورغم إني من أول ماسمعت عن المسلسل من السنة الماضية قلت يارب أعمل مشهدين في المسلسل لأنى كنت سامع عنه". تابع: " لما كلموني أعمل "أوديشن" كنت متردد وخايف فكلمت مراتي وقتها كانت في فرنسا قالت لي :"روح فوراً" وحاولت أشرح ليها مخاوفي قالت :"روح فوراً" وبعد نزولي وأدائي للمشهد كلمتها وقلتلها أدائي كان وحش جداً، أكيد مش هاخد الدور". أكمل: "تفاجأت الفجر أن Casting director بيكلمني وبيقلي مبروك المخرج بيتر ميمي وافق عليك وقابلته وقعد يتكلم معايا ويشرح الشخصية وعرقت يومها وأنا بتكلم وروحت قرأت الشخصية وكنت خايف وسألته باي ثقة شايفني أعمل الدور ده ؟ خاصة أن السنة الماضية كنت عامل كوميدي وبكتب كوميدي من أين جئت بالثقة إني أقدم دور زي ده؟ وكنت خايف أبوظ المسلسل لأني لو عملته وحش هجبلهم نقد يومي لأن مشاهدي يومية".
وعن وقوفه أمام الفنان كريم عبد العزيز قال: "أنا متخضتش كده في حياتي إلا أمام الاستاذ كريم عبد العزيز كان ليه طلة مع الشكل بالزي الأسود خلاني في أول مشهد نسيت الكلام وكان أول مشهد هو مشهد المناظرة لما قلي مش آن الآوان نفتح قلوبنا لبعض .. وهو نجم كبير عارف يتعامل مع الممثل اللي قدامه فاهم إحساسه". وعن أصعب المشاهد التي خشي منها قال: مشهد قتل أصحابي كنت شايل همه من الأول من الورق ومكنتش عارف أعمل إيه والمخرج بيتر ميمي مراية لينا بيقولنا على الحلو حلو والوحش وحش".
وعن الإصابة التي تعرض لها، خلال مشاركته في مسلسل "الحشاشين" بسبب سقوطه من على الحصان، قال : "أصبت وكتفي اتخلع في مشاهد المعارك".
