ساعات أفضفض وبتكلم وأقول جايز يروح همى ألاقى نفسى بتعافر يفور دمى بخبى ورا الضحكة بحور ألم ومين يسمع ومين يرحم ومين بيشوف وكل حاجة يا مصر على المكشوف يا خسارة و ألف خسارة يا بلدى ماليك الخوف ويا خسارة هناك زيى كتير ساكتين سلاحها حروف مصر عاوزة الأمل ... عاوزة العمل يجدف ويا صبرها و يغزل من دواها الصوف مصر ألف بيزرعوا و ملايين تانيه بيقلعوا واحد يداوى لكن يوجعوها ألوف ............................ عارفة يا مصر بقيت أنزل كل شهرين ليه ؟ بأشم نسيمى جواكى وقلبى عليل بيهواكى ولما أبعد تروح روحى برجع تانى وألقاكي على ميعادى لكن كل مرة أشوف روحك بتطلع كأنه خلاص دا العادى ........................... بقيت أشوف وشوش مش مننا وشوش غير الوشوش شكل البشر لكن وحوش طلعوا منين ما تفهموش العيب فى مين ؟ فى الصمت ولا فى ظلم السنين يا ألف خسارة يا مصر لو تاهت ولو باخت ولو شاخت بعمر النيل وبسأل فين ؟ شباب الدنيا وشموخها وغنى المواويل ولو شاخت يبان الحزن فى لونها فى وسط ميدانها وأحزانها بقت واقفة هناك عالشط تستنى بتنزف ألم بتبكى ألم وتشكى نغم وأنا فى الضلمة أقيد شمعة أقول تانى أنا جايلك بس عهد الله عليكى ارسمينى وارسمى فى اسمك يمينى احلفى بالله تعالى وحلفينى إننا بنحب بعض بس بعض البعض منا ليه فى وقت الشدة يقلع نن عينى ؟ ............................. يااااااه عالغنا تحت البكا والكتابة بالدموع والصلاة ويا الخشوع أيوة يابلد أنا هنا عاشق الرجوع غريب عنك وجواكى ومين هيداوى فى جرحك ولو ينسانى ينساكى بعذب روحى من حضنك وبتمرمغ عشان عاشق صبابة الحب وياكى من فضلك ممكن طلب .... تداوينى عشان عارفة منين الجرح يكوينى يا روح الروح فداك روحى ..... فداك قلبى ...... فداك عينى ....... فداك العمر وسنينى !!