رفع عصاه فى حوش اللجان الفرعية بالوراق وقال، "عايز رئيس جمهورية يطلع المسجونين اللى اتسجنوا بعد الثورة عشان إحنا فى أزمة وربنا يأخذ بيد البلد"، هذه مقولة الحاج عبد العزيز، الذى أصر على الحضور للإدلاء بصوته فى جولة الإعادة بالمرحلة الثالثة لانتخابات مجلس الشعب. اقترب منه"اليوم السابع"لمعرفة شكواه بمدرسة النيل الابتدائية بالوراق، وقال سعيد عبد العزيز، الذى يبلغ من العمر 70 عاما: "حضرت اليوم وأنت زى ما شايف مش قادر أقف على حيلى، ولكنى أصررت على الحضور لأنى عايز مصر تنظف من الفلول". وأضاف: "بعد الثورة والانفلات الأمنى وانتشار البلطجية حكموا على ابنى وشيلوه قضية مخدرات مع العلم أنه سواق ميكروباص وميعرفش حاجة وهو إللى بيصرف عليا أنا وأخواته البنات لأنى كنت نجار مسلح وكبرت يا ابنى ومش قادر على الشغل وعايزين رئيس جمهورية زى حازم أبو إسماعيل عشان الراجل ده عارف ربنا وحاسس بالغلابة إللى زينا لا عنده فيلا ولا عنده قصر مش زى البرادعى اللى كان غايب عن البلد ومايعرفش عنها حاجة". وعبر عن استيائه عما يحدث فى ميدان التحرير قائلا "الناس دية مش عايزة استقرار ومش عايزين البلد تعدى على خير وعارف يا ريس المجمع العلمى اللى حرقوه ده كنز فى خرائط مصر كلها وهى من قبل الملك فاروق وفيها رسم من شرقها لغربها". وختم الحاج حديثه "ربنا يوفق الجميع ويعدى مصر على خير عشان الناس كلها تعيش فى أمان وسلام".