يا حزينة .. الحزن عُمْرِكْ والحزانى غَلِّبُوكى ياللى ساكنة فى قلوبنا وبلطجية يسكنوكى عمرنا كله فداك عمرهم ما ريحوكى فَرْحِنا نقسم فى قُوُتْنا فَرْحِهُم لو يقسموكى لابسة توب إسود حزين والوش متغطى بطرحة فرحتك لحظة بُكاك لو فى شدة أو فى فرحة إبكى جايز يرحموكى ياحزينة .... والزمن مليان حزانى فينا من صانك .. حبيبك وفينا من خان الأمانة فينا من عاشقك قوية وفينا من عاشقك مُهانة .................. شفنا سجانك سَكَتْنا قلنا دا حياتك فى مُوتْنا واختيارنا كان حياتنا يبقى كان لازم تِمُوتى جيت أقولها بأعلى صوتى يا يتيمة العمر كله ربى لو يسأل ها قُولْ لُه إننا فرطنا فيكى وببساطة مشينا نسأل يا حزينة فين أبوكى ؟ فين أخوكى ؟ ليه ولادك يحرقوكى !!! ليه بغازك سمموكى !!! إنتى بتموتى وحيدة والقاتل فاكرك سعيدة يابن بلدى فى ميدانى بيع أمانك بيع أمانى واشترى لها عمر تانى الحزينة واقفة تبكى قاعدة بتعد الثوانى قاعدة تستنى فى موتها م اللى خاين والأنانى والحقيقة الْمُرَّة إنه ..... كله واحد .. كله جانى يا حزينة .. كله جانى يا حزينة .. كله جانى