التحدى كبير وصعب لكن المصريين يقدروا وبدأت مرحلة جديدة فى حياة مصر.. مرحلة لا يمكن فيها إلا العمل العمل فقط هو الخلاص من حالة الانكسار التى نعيشها منذ عدة شهور، وربما اقتربنا من العام. بدأ تعويم الجنيه منذ يومين فى البنك المركزى، ليتم فض الاشتباك، فهل حجة الدولار انتهت؟
أم أننا سنظل نندب حظنا، ونبكى على الدولار عندما كان ب7 جنيهات.. الخطط الاقتصادية مش كفاية نحتاج إلى وعى ومثابرة وجهد لإنجاح وتفعيل أى خطة اقتصادية.. محتاجين نشجع المنتج المصرى نشتريه. وعلى المصانع والعمال دور لازم يجودوا فى الإنتاج علشان ما نشتريش من بره كفاية استنزاف لطاقاتنا وفلوسنا فى خارج مصر.. أى واحد بيسافر برة يشوف منتجاتنا موجودة بس جودتها أعلى احنا كمان محتاجين نشترى المنتجات ذات الجودة العالية.. نحتاج أن يقتنع الشعب إنه يستغنى عن بعض الرفاهيات مافيش سيارات جديدة على الأقل لعام كامل.. مافيش تليفونات محمولة أحدث موديل.. بلاش الأطعمة المستوردة خلينا فى المحلى.. سنة واحدة هتفرق كتير.
أكل القطط والكلاب نعمله فى البيت.. كريمات التجميل مالهاش لازمة ولا بتعمل حاجة نستغنى عنها شوية.. مالها الوصفات الطبيعية..
الكافيار و«الفواجرا» نقدر نصوم عنها مش هنموت من الجوع..
طبعا أنا مش ناسية إن ناس كتير بيوتها مفتوحة من استيراد وبيع هذه المنتجات بس ممكن يكون الحل إننا نبيع ونستبدل المنتج المصرى وهنا هيجى دور الدولة كل المصانع اللى مقفولة تتفتح.. عجلة الإنتاج لازم تدور بجد كفاية قرارات بيروقراطية وكسل.. الشعب هيقوم بواجبه والحكومة كمان لازم تقوم بواجبها..
محتاجين كمان ننظف بلدنا.. عايزين الشباب الكتير اللى من غير شغل يطلقوا حملات زى حملة «نضف بلدك».. حمله «اشترى المصرى» «حملة لا للرشوة» وحملة «ترشيد المياة والكهرباء» حملات كتير لازم نطلقها احنا الشعب مش لازم ننتظر برامج ومذيعين. يعنى مثلا ليه لازم ننتظر تبقى فى جمعية لكفالة اليتيم ليه ما نعملش فريق من كل حى ونشوف كل اللى محتاجين على الأقل نطمن على فلوسنا رايحة فين.. فى خطط مش هنقدر نحطها وننفذها لازم الدولة تعملها وحاجات تانية كتير أوى نقدر نجتهد وننفذها.. المهم الإرادة اللى جوانا.. إرادة النجاح مصر لازم ترجع تانى حلوة..
التحدى كبير وصعب لكن المصريين يقدروا.. الفترة اللى بتعيشها مصر هى فترة حرب طويلة وباردة من غير مدافع ولا طائرات.. حرب الجيل الرابع والخامس والسادس.. محتاجين كل العقول تفكر كل واحد فى تخصصه.. كلنا لازم ننجح.
الحرب فى حد ذاتها مش جديدة علينا لكن الجديد إننا نفكر تفكير مختلف.. تفكير خارج الصندوق لأن العالم المتقدم كله بيفكر خارج الصندوق والحلول التقليدية للمشاكل لن تحل بطرق تقليدية..
الأعداء كتير واللى جوه البلد واللى منا أكتر بكتير من اللى بره.. مش هعلق على هزيمة البرادعى الكلامية ولا على انحطاط يسرى فودة ولا على كل الخونة اللى باعوا بلدهم فى مقابل حفنة فلوس.. بلدكم يا شرفاء محتاجة لكل نفس وكل عقل..
المشوار لسه طويل بس احنا أكيد هنتحمل.. على فكرة ده مش كلامى ده كلام شباب كتير لسه عندها ثقة فى مصر وثقة فى قدرة المصريين على تجاوز الأزمة.
