طالب مرتضى منصور رئيس الزمالك لاعبى الزمالك، الأداء بروح قوية فى لقاء القمة أمام الأهلى، قائلا للاعبيه، "اعملوا حسابكم أن الماتش هيتلعب فى ملعب مختار التتش قدام 100 ألف متفرج أهلاوى وعايزكم تطلعوا الطاقة اللى جواكم". انتقد رئيس الزمالك الازدواجية فى التعامل مع قضية الألتراس، حيث هاجمه الجميع بسبب صراعه مع روابط الألتراس واتهامه لهم بالبلطجية، فى الوقت الذى أشادوا فيه بموقف محمود طاهر رئيس الأهلى بعدما اكتشف حقيقتهم ومنعهم من دخول النادى وهو ما فعله من قبل. أردف مرتض منصور، "أنا مش كل ماتش هقول للمدرب لو خسرت هتروح، وباتشيكو وفيريرا هما اللى هربوا"، متابعا، "السنة اللى فاتت كسبنا الأهلى بالحب لما باسم يجيب جون كل اللاعيبه تجرى عليه ده كان سر فوزكم، وأنتوا أحسن من الأهلى.. هو نادى كبير وعنده لاعبيه قوية لكن أنتو أحسن منهم وكسبتوهم قبل كده.. وكلكوا كسبتوا الأهلى حتى اللاعيبه الجداد كسبوا الأهلى مع أنديتكم القديمة.. وأنا مش بطلب منكوا نتيجة لكن بطلب تبقوا رجالة فى الملعب، وعايزكم تبقوا زيى اتحبست قبل كده لكن بإرادة النصر قدرت ارجع تانى وابقى رئيس نادى وعضو برلمان وعايزكوا تبقوا كده، وأنا شايف أن أنتوا أحسن فريق جه فى تاريخ نادى الزمالك كأفراد ومجموعة". كما طالب مرتضى منصور لاعبى الفريق الاول بنسيان مكان إقامة مباراة القمة المحدد لها الثلاثاء المقبل، قائلا: "مالكوش دعوة المباراة هتتلعب فين حتى لو فى الهند". قال رئيس الزمالك خلال الجلسة التى جمعته باللاعبين اليوم، إن مجلس الإدارة والجماهير تنتظر منهم الفوز على الأهلى فى المباراة المقبلة، مشددا على أن الفوز على الغريم التقليدى يعد خطوة رئيسية فى الاحتفاظ بلقب الدورى. أشار منصور إلى أن الفريق يضم بين صفوفه أفضل اللاعبين فى تاريخ نادى الزمالك، قائلًا لهم: "اجتمعت معكم الموسم الماضى بدون جهاز فنى لأنكم رجالة".
