"مش بنام" "مش بننام" "أنا نفسى أنام بس البيبى ما بينامش ولا بينيمنا خالص".. الشكوى دائمة التكرار من الأمهات حديثات العهد بالأمومة اللاتى يشعرن بالعجز أمام رفض أطفالهن النوم فى ميعاد محدد أو حين يردن النوم. ومن أجل تقديم حلول واقعية ومجربة للأمهات الجديدات بعيدًا عن الكلام النظرى، سألنا العديد من الأمهات حول تجربتهن الخاصة والطريقة المضمونة التى يتبعنها من أجل نوم هادئ هانئ وسريع لأطفالهن.. وإليكِ الإجابات.. 1- "سهى حنفى" طفلها يبلغ من العمر عاما و6 أشهر تقول "بلاعبه وأزغزغه.. لما بيضحك كتير بينام بسرعة وبيكون مبسوط، وأحيانًا بغنى له لما يكون مزاجى رايق أما لو مش رايقة بقف بيه فى البلكونة بينام من الهوا من غير تعب". 2- أما إيمان التى يبلغ طفلها من العمر 6 سنوات فتقول "محظوظة بإن طفلى ينام بسهولة، كل اللى بعمله بندخل الأوضة وبطفى النور فينام، وفى الشتاء أول ما يدخل تحت الغطاء ويحس بالدفا بينام، أما وهو أصغر شوية كان بيحب يتفرج على فيلم كارتون بيحبه". 3- وشاركتنا "نورا النحاس" طريقة جربتها مع جميع الأطفال فى أسرتها وترى أنها فعالة وهى "بحكى حكاية وأشرك الطفل فيها وأنا بحكيها، لكن بشكل غير مرهق للعقل علشان ما يتنبهش، كل دا بصوت هادى وحنون حتى لو استخدمت مؤثرات صوت خلال الحدوتة بتكون بهدوء إلى جانب الهدهدة لو كنت واخداه فى حضنى مثلاً، أفضل أهزه بشكل خفيف مع الصوت الهادى". 4- وتقول "إيمان محمود" "أنا عندى بنتين وولد بنت 9 سنين و7 سنين هما بيناموا فى أوضه لوحدهم بقولهم روحوا اغسلوا سنانكم وادخلوا ناموا بيدخلوا، يفضلوا يتكلموا سوا أو يتخانقوا أو يلعبوا ربع ساعة بالكتير بيكونوا ناموا؛ عندى كمان ولد عنده سنة بقعد ألاعبه لحد لما ينام أو نغنى أو نفتح موسيقى هادية أو قرآن بينام عليهم كويس يعنى هو كل يوم مختلف معاه على حسب المود بتاعه". 5- وتحكى "دينا ممدوح" التى يبلغ طفلها من العمر سنة عن تجربتها "فى الأول مكنتش فاهمة إن الأطفال بمزاجهم بيناموا وبيعندوا، بدأت بالهز كتير لحد مابقى مينفعش، وحاليا ماشية على أغنية معينة والقرآن خاصة سورة مريم كان بيسمعها وهو فى بطنى لسة فحسيت كأنه عارفها أول ماتبدأ بيسكت"، وتنصح الأمهات "تثبيت أدوات النوم من هدوء وضوء خافت وصوت محدد بيجيبوا نتيجة جدًا". 6- أما خطة "نضال هزاع" مع طفلها الذى يبلغ من العمر 3 سنوات فهى "بطفى النور والتليفزيون واستدرجه لحد ما ينام، يعنى مثلاً أقوله هات اللعبة الصغنونة دى تنام جنبنا، عارف بقى الولد اللى اسمه عادل عمل إيه.. مبيرضاش يشرب اللبن وهكذا يعنى.. لحد ما ينام وانام". 7- وتحكى "رحمة إسلام" عن طفلتها البالغة من العمر عامين "من وهى شهور أو يمكن أيام كمان وأنا باخدها فى حضنى، أحكيلها حدوتة من تأليفى، بعدين بفتح كتاب أو موبايل واقرا فيه ليا ولما بتزن بقرالها بصوت عالى". 8- وأخيرًا قالت "علا البابلى": "أولادى بغنى لهم أغانى أطفال وأهزهم على رجلى، وابنى الأكبر لما بيلعب ويتهد من اللعب بطلعه بس على السرير واطفى النور مش بعمل أى حاجة يقوم ينام لوحده".