اللى عايش فيها نفسه يلقى على باسبوره فيزا واللى برّه هَزَمُه يأسُه غُربته مابقتش ميزة واللى واقف بين بينين لسه قُدامه البابين لو قفل باب الحنين تنجرح نفسه العزيزة إختيار مافيهوش بدايل ينجد الروح من وجعها والرحيل بين دمعه شايل ذكريات رافضين وداعها من بلاد الله لخلقه البراح مين اللى خانقه؟ والونس إيه اللى قالقه؟ والخطاوى مين خدعها؟! قاسية غربة روحنا فينا بين دفا الأوطان وجوعنا الشراع خان السفينة ولاَّ سلمنا لوجعنا إيه اللى خلانا جازفنا؟ كان طموحنا ولا زيفنا؟! ف السفر حاضنين نزيفنا وخوفنا بيعاند رجوعنا واللى عايش فيها نفسه يلقى على باسبوره فيزا واللى برّه هَزمُه يأسُه غُربته مابقتش ميزة.