التالتة تابتة.. مستحيل المرة دى تمر مرور الكرام.. ولا مرور اللئام، ولا حتى مرور العباسية! لا يمكن الصمت، أو حتى محاولة تهدئة الأجواء، قبل إصدار قرار ينتظره الشارع المصرى والعربى. القرار يا سادة مالوش أى علاقة بإقالة جهاز شوقى غريب، أو استقالته.. ولا حتى عن حل اتحاد الكرة، أو تقديم مجلس الجبلاية برضه استقالته.. مع العلم أن الاستقالة والعياذ بالله كلمة غير مطروحة، ولا تشكل حروفها حالة قراءة لأهل الجبلاية! لا شوقى غريب.. ولا مجلس علام.. يمكن أن يكونا كبش الفداء علشان نسكت، أو حتى نصبر! مين قال إن تغيير الجهاز هو الحل؟! ومين يقدر يقول إن حل اتحاد الكرة هو بداية طريق الإصلاح؟! شوقى غريب يمشى، اتحاد الكرة يرحل.. طيب بعد كده؟! طبعا.. اختيار جديد لمدير فنى، ثم تعيين مجلس مؤقت، حتى ترضى عنا «الفيفا»! إنما مين يختار الاتحاد اللى هيختار المدربين؟! هو ده الكلام.. يعنى نجيب جمعية عمومية الصوت فيها بالتقسيط، المزاد عليه يبدأ من 20 ألف علشان إفشال عقد أى جمعية لمناقشة فيه سندوتشات.. ولا طبيخ؟! هل يمكن أن تختار جمعية كل تفاصيلها تبدأ، وتنتهى عند جملة «على البركة يا رجالة»!! المصيبة أن الفرحة والتهليل اللى المفروض الناس مش يرفضوها، لا.. ده كمان البوليس يقبض عليهم.. الفرحة دى بتحصل عندما لا تكتمل الجمعية.. تخيلوا.. ويخرجوا يقولوا لنا «كدنا العوازل».. والجمعية فوضتنا.. الله يلعن كده.. وكده كمان؟! الكارثة.. أن هناك «خطايا».. بالجملة.. لكن «أستيكة».. البلد وظروفها.. وأنهم أبطال علشان فيه دورى رغم كل الظروف.. ممكن تمسح أى محاولة كتابة ولو سطر فى صفحة التطوير! هل يمكن أن تعمل «مجموعة الجبلاية».. ليل نهار، دون سند من استراتيجية، لمجرد عدم دخول أى عناصر محترفة يمكن لها أن تكون فاعلة وتقدم الجديد للكرة المصرية؟! إيه بقى يا عم.. جديد مين؟!، هو ممكن حد كده يحاول التغيير، يعنى يطالب بلجنة فنية محترفة لا تختار بدون شفافية.. فقط «السيرة الذاتية».. إللى هى «سى فى» سيادتك! لكن لازم نفهم أن دخول تحديث ومعادلة محترفين يديروا كرة بلدنا معناه قطع السبابيب.. ووجود «فران» ياخد العيش لأنه خبازه! هنا يأتى دور الدولة.. نعم الدولة حضراتكم.. تانى الدولة سيادتك! إحنا مش عايزين الدولة تلعب كورة.. أبداً، إنما لازم تحاسب بأجهزتها على الملايين اللى انصرفت هباء، دون خطة.. دون هدف.. يعنى حاجة ببلاش كده! يجب أن تسأل الدولة.. وتنتظر إجابات لحساب اتحاد ملاك مصر.. الشعب يعنى حضراتكم! يجب أن تسأل الدولة عن عدم إقامة دورى محترفين حتى الآن! الدولة كمان لازم تسأل حتى لو كل يوم إلى أن يأتى لها رد عن سبب عدم بيع اللاعبين الشباب للأندية الأوروبية بأى سعر.. طيب واللى يقول: دى فلوس النادى؟! خلاص عليه إنه يدبر أمره.. فلا يسأل الدولة صاحبة تفويض الإدارة من الشعب عن دعم ملاعب، ولا دعم حلاوة طحينية حتى؟! آه.. طبعاً.. لازم نعرف مين ورا حالة التسيب وإهدار الملايين اللى بتحصل دى؟! عايزين نعرف علشان نكشف كل واحد بيلعب وعنده وظيفة، أو بيدرب «وخالع» من الشغل.. أو بيشفط 50 ألف جنيه شهرياً غير الفكة مع أنه لا يمكن أن يفيد.. حتى بمسافة «رجل نملة»! الدولة يجب أن تراقب هذا التسيب وتعطى إشارة البدء لفتح كل ملفات التطوير.. قبل ملفات الفساد. إنما الدولة تسكت، هنا يكون شىء كارثى صمت القبور يزيد من صعوبته! صمت قبور إيه؟!، ده البشر الأحياء، لما يأسوا من وجود عيشة مع أمثالهم، شقوا جدار صمت القبور، وعاشوا هناك؟! آسف يا قبور.. معلش يا صمت.. الحقيقة طفح الكيل والمرار الجوانى هرانى.. لكن يا أخى العزيز وسيدى الفاضل قارئنا المحترم.. مش عارف الناس دى جنس ملتها إيه بالضبط؟! كرة القدم فى العناية المركزة من 20 سنة.. أحياناً تخرج تزور أهلها وترجع، والحل الوحيد والأمثل أنها تتعالج فى بلاد برة.. مفهووووووووووم.
