أبو راسين: أنا لو من الداخلية كنت شغلت مخى كويس، بس الداخلية مش فاهمة حاجة، طول عمرها جايبة لنفسها الكافية.. أبو راس: يعنى كنت عاوز الداخلية تعمل أكثر من اللى هى بتعمله إيه ؟ خراطيم مياه، وقنابل مسيلة للدموع وخرطوش، وحوائط أسمنتية وسجل، ناقص إيه تانى، العيال الهايجين دول ما بياكولش معاهم الكلام ده بيلبسوا كمامات وبيحطوا كولا وخل وبصل وبيقاوموا دول عيال بايعة نفسها، قابضة يا ولدى. أبو راسين: عارف يا أبو راس الغباوة ماسكة فى البلد دى من أول المقطم لحد التحرير ولاظوغلى وقصر الاتحادية، أنا لو مسكونى البلد دى كام يوم كنت حليت كل مشاكلها، ولميت العيال دى. أبو راس: كنت حتعمل إيه يا ابو راسين نورنى ما انت براسين مش براس واحدة يعنى بتفهم أكثر منى، قول يا أبو المفهومية. أبو راسين: بص يا ناقص عقل.. العيال دى لو قابضة ممكن نديهم أكثر وساعتها حيسيبوا الميدان والقصر ويرجعوا لبيوتهم. أبو راس: انت عارف الإخوان مش بتحب الرشوة. أبو راسين: بإمارة إيه يا أبو مخ طخين ؟ بأمارة الزيت والسكر والرز اللى كانوا بيفرقوه أيام الانتخابات على الغلابة. أبو راس: طيب لو العيال دى على حق ومش قابضة تعمل معاهم إيه يا أبو راسين. أبو راسين : العيال دى مش بيخافوا من حاجه صح ؟ أبو راس : أيوه صح. أبو راسين: سيبك بقى من الغاز المسيل للدموع اللى بيخنق ده ليه حل، وسيبك من الخرطوش اللى بيقلب البلد، وبيألب علينا المعارضة وجبهة الإنقاذ والإعلام، والرصاص الحى حيألب علينا الغرب وأمريكا وحيقولوا إننا سفاكين دماء، وسيبك م السحل والاعتقال كل ده ما ياكولش. أبو راس: أمال إيه اللى ياكل مع العيال دى ؟ أبو راسين: العيال دى مش شباب يعنى لسه أغلبهم ما اتجوزش ؟ أبو راس: أيوه يا سيدى همه حيجوزوا منين ؟ هو فيه فلوس فى البلد دلوقتى إلا مع الإخوان ؟ أبو راسين: خلاص يبقى مفيش غيره. ابو راس : إيه ده ؟ أبو راسين: غاز مؤثر فى الأعضاء الجنسية، العيال دى ممكن تضحى بنور عنيها زى "أحمد حرارة" كده لكن مش ممكن تضحى بالغالى، بأعضائها الجنسية. أبو راس: قصدك الداخلية ترمى قنابل تمنع العيال دى من انهم يخلفوا فى يوم ويجيبوا عيال ؟ أبو راسين: لا مش كده الغاز ده بيعمل أكثر من كده، ده حيصيبهم بالخمول اللى مالهوش علاج، حيخلى أجدع شنب فيهم سعاد، لا هينفع طبلة ولا طار. أبو راس: هيحلوها بالقرص الأزرق. أبو راسين: الغاز ده لا هينفع معاه قرص أزرق ولا قرص أخضر ولا حتى حجر جهنم ده غاز سره باتع بيموت الأعضاء الجنسية وبيعمل لها ضمور. أبو راس: يخرب بيت دماغك ده ضد الانسانية ده هتلر نفسه ماعملش كده هتلر حرق اليهود والحرق أهون من اللى أنت ناوى تعمله ده. أبو راسين: هتلر مين يابا ده أنا أبو راسين هتلر جنبى صفر على الشمال. أبو راس: على قولك بس هتعمل ايه مع منظمة حقوق الإنسان. أبو راسين: تخلص الأول مع العيال دى ونشوف صرفه مع منظمات حقوق الإنسان وبعدين الغاز ده ليه فوائد تانية. أبو راس: فوايد إيه تانى. أبو راسين: بيمنع حالات التحرش والاغتصاب وبيحدد النسل. احنا 90 مليون مش لاقين ناكل كفاية خلفه وعيال علشان نقدر نعيش ده انا كده حيعملوا ليا تمثال ويحطوه فى ميدان عام أبو راس: لأ أنت كده هيشنقوك فى ميدان عام ويضربوك بالجزم وحاجات تانية. أبو راسين: الإخوان حيدافعوا عنى ما انا حلم لهم الليلة اللى مش عارفين يلموها والميادين حتفضى فكرك لما العيال دول حيسمعوا عن الغاز ده حد حيستجرى ينزل يتظاهر ده كل واحد حيحط ايده على أعضائه ويطلع يجرى يقعد جنب أمه. أبو راس: ولو مخافوش هتعمل إيه. أبو راسين: يا بنى دول مصريين المصرى ممكن يتساهل فى أى شىء إلا فى أعضائه، وخاصة اللى بالى بالك وبعدين ده غاز مش هينفع معاه أى واقى ذكرى. أبو راس: طيب وحتجيب الغاز ده منين ؟ أبو راسين: عم خيرت يسافر الصين دول ولاد هرمه يديلهم قرشين وحيعملهوله، ويا دار مادخلك شر ويرجع بيه ونلم الليلة. أبو راس: طيب أعرض الأمر. أبو راسين: بكره طالع المقطم أعرض الأمر على الكبير أبو الروس وحوافيك باخر الأخبار. سلام ياابو راس أبو راس: سلام يا أبو راسين.
