على مقهى الدولة المدنية التقى دستور «الغرياني» «النانى كمان نانى» مع دستور عمرو موسى.. وحاول دستور الغريانى أن يهرب من المواجهة.. لكن دستور مرسي «عكشه» من قفاه وسأله: دستور موسى: على فين يا حلو؟ دستور الغريانى: وانت مالك !.. رايح أصلى عندك مانع؟ د.موسى: قديمة وعملتها قبل منك د.الغريانى: رايح مطرح ما رايح انت شأنك إيه! د.موسى: خلى الناس تشوفنا مع بعض شوية ولا خايف من المقارنة يا مسلوق؟ د.الغريانى: لو أنا مسلوق يبقى أنت دستور «البيادة»! د.موسى: البيادة اللى بتتكلم عنها.. أشرف من مليون دماغ فاضية زى بتاعة الجماهير إياهم! د.الغريانى: بلاش قنزحة كدابة ياعم الطاووس.. انت عارف وأنا عارف إن البلد مليانة قوانين وطول عمرها فيها دستور.. لكن عملنا بيهم إيه؟ د.موسى: ما هي دى مشكلتكم.. عملتوا دستور مش عشان البلد تمشى عليه.. لا عشان البلد تمشى من تحته ومن فوقه د.الغريانى: فرحان قوى بدستور العلمانية والكفرة! د.موسى: ياراجل اختشى وقول كلام غير ده..! د.الغريانى: قعدتم تطلبوا وتزمروا عشان الشعب ينزل.. والعملية تكسف د.موسى: 95٪ تكسف أمال ال 16 مليون اللى رفضوا دستوركم تقول عليهم إيه! د.الغريانى: في النار وبئس المصير د.موسى: يكونش مع سيادتك مفتاح الجنة والنار واحنا مش واخدين بالنا وبعدين انت ناسى يا عم الغريانى إن أنا كنت في لجنة دستوركم وسيبتها لكم ومشيت زى غيرى د.الغريانى: انقلاب ياباشا د.موسى: طيب أنا عايز اسأل حضرتك سؤال واحد مفيش غيره! د.الغريانى: بس أوعى يكون محرج د.موسى: انت قريت دستورنا! د.الغريانى: أعوذ بالله واقراه ليه هو أنا ناقص وجع قلب د.موسى: مش يمكن وأنت راجل بتاع قانون تغير رأيك لما تقرأه؟ د.الغريانى: الجواب يبان من عنوانه د.موسى: وعنوانه إيه ياترى د.الغريانى: انقلاب ضد الشرعية د.موسى: وموافقة الشعب بالنسبة العظيمة اللى حصلت مش شرعية! د.الغريانى: لا طبعًا د.موسى: عندك حق. لأن الشرعية عشان تبقى شرعية بجد.. لازم تكون واخده ختم البيت الأبيض وأردوغان والدوحة د.الغريانى: إحنا مش محتاجين أختام حد..إحنا «مختومين» على القفا! د. موسى: سلم لى ع القفا.