كنت أتابع آخر التطورات التي وصلت إليها حملة التبرع الشعبية ل"دعم مصر"، بهدف الاستغناء عن المساعدات الأجنبية، وعلى رأسها المعونة الأمريكية.. وإذ فجأة سمعت المفعوص أبو نص لسان يهتف قائلا: - مثر لن تركع.. مثر لن تركع! - أيوه يا حبيبى إن شاء الله "مصر" لن تركع.. بس إيه المناسبة إللى خلتك تقول كده دلوقتى.. - إيه يا حج.. انت مش بتشوف تليفزيون.. وبتقرا جرايد..؟! - طبعا بشوف وبقرا.. إيه الجديد يعنى! - إحنا ما ثدقنا خلثنا من حكاية المعونة الأمريكية.. تطلع لنا "قطر" وتطالب باثترداد "الوديعة" بتاعتها إللى كانت حطاها في البنك المركزى أيام الرئيث المعزول "أطال الله حبثه".. هي عاوزانا نبوث إيديها ولا إيه.. ملعون أبو النفظ إللى خلا "كشك" الخليج يتشرط على "أم الدنيا"! - حقها.. ولا مش حقها؟! - حقها طبعا.. بث دا شغل عيال.. والرجولة بتظهر وقت الشدة..! - آهو.. أديك قلت.. الرجولة بتظهر وقت الشدة.. وفيه ناس مهما حاولت تخليهم يسترجلوا مش هتعرف أبدا.. ومصر إن شاء الله مش هتكون "ملطشة" للى يسوا وإللى ما يسواش! - أنا عارف يابويا.. بث إنت شايف الأحوال ماشية إزاى.. وإحنا محتاجين كل دولار اليومين دول عشان الاحتياطي النقدى الأجنبى! - الاحتياطي النقدى الأجنبى؟!.. دا مين إللى عرفك الحاجات دى؟! - من التليفزيون والجرايد.. - بس العيال في سنك بتتفرج على "توم وجيرى" وبتلعب كورة.. وملهاش دعوة بالسياسة والاقتصاد والكلام الكبير ده.. - ما هي "قطر" عاملة زى العيل "الرخم" إللى مش بيعرف يلعب بث هو إللى معاه "الكورة".. ولما نوافق نلاعبه معانا ييجى فجأة وياخد الكورة عشان يعكنن على الكل.. - الله يجازى شيطانك.. أديك جبت المفيد!