كنباوي يتململ في جلسته على الكنبة ويتقلب يمنه ويسره فتراه كنباوية من بعيد فترمقه بنظرات عينيها العسليتين وتبتسم في خبث وتقترب منه هامسة: كنباوية: الحلو ليه حيران أوي ؟ مالك ياكنبتي ؟ كنباوي: قرفان ياكنباوية الظاهر القرف مكتوب علينا أنا يوم وأنتي يوم. كنباوية: إيه بس اللي حصل ومكدرك كده ؟ فيك إيه ؟ قولي ؟ وأنا أريحك كنباوي: ياريت ياكنباوية ياريت تقدري تريحيني احسن انا تعبان أوي ومش عارف انام ولا عيني راضية تغفل حبة والجو كمان حر وانا مش طايق نفسي كنباوية: إن شاء الله اريحك بس قولي إيه اللي مزعلك بالشكل ده ؟ كنباوي: بعد ماقلت الجيش والداخليه حيفضوها لقيت مصدر أمني رفيع المستوي مسرب بيانات لجورنال من الجرايد التقيلة بيقول إن فض الاعتصام مش حيتم بالقوة ومش حيتم بين يوم وليله لأسباب امنية ودبلوماسية واقتصادية كل ده خلاهم يغيروا الخطة اللي كانوا ناويين ينفذوها في ساعتين والاعتصام حسب الخطة الجديدة التدريجية حيتفض في شهر أو شهرين او تلات شهور حسب الخطة الموضوعة بين الداخلية والجيش والمخابرات والأمن الوطني كنباويه: شكلها ايه الخطة التدريجية دي ياكنباوي اللي المصدر رفيع المستوي والقريب من الجهات السيادية سربها للجورنال بتاعك ؟ كنباوي: انا اقولك ياستي الجيش والداخليه حيستعملوا مع معتصمي رابعة والنهضة سياسة النفس الطويل والحصار الاقتصادي كنباويه: يعني ايه ياكنباوي وهمه ناويين يعملوا ايه مع الإخوان ؟ كنباوي: الخطه حتبتدي بقطع النور عنهم في مربع رابعه العدويه وبعدها حيتم قطع الميه وكذلك النهضة أيضا وبعد قطع النور والكهربا والمية حيمنعوا أي حد يخرج من رابعه أنه يرجع يدخلها تاني وبعد كده حيمنعوا أي اطعمة من دخول رابعة العدوية وعدم السماح لأي سيارة محملة بالأكل والأطعمة من المرور لإشارة رابعة العدوية. كنباوية: فكره حلوة والله لا مية ولا نور ولا أكل كده حيخرجوا من جحورهم زي الفيران كنباوي: وبعد كده حيحاوطوهم بخراطيم المياه وقنابل الغاز واللي يطلع منهم حيشقطوه على طول وخصوصا لو عليه أحكام حيروح في داهية طوالي ده غير انهم حيعملوا حسابهم بتأمين أي مكان ممكن الإخوان يروحوا يتجمعوا فيه بعد فض اعتصام رابعة العدوية والنهضة، وخاصة أن اعداد المعتصمين قلت كتير عن الأول بعد ما زهقوا من وعود رامبو الإخوان البلتاجي بيه ودراعه اليمين عم حجازي المراجيحي اللي قاعدين يوعدوهم كل شوية بخروج مرسي لما روح المعتصمين قربت تخرج ومرسي مش حيخرج لدرجة أن المعتصمين زهقوا من القعدة في الشارع والنوم في الشارع والوعود الكدابة اللي مابتتحققش ابدا كنباوية: ازاي زهقوا والبلتاجي جاب لهم ترابيزات بلياردو وترابيزات بينج بونج علشان يسلوا نفسهم ويرفهوا عن نفسهم يمشوا ليه بقي وهمه عايشين آخر دلع كنباوي: مش بلياردوا وبينج بونج بس ده كمان جاب لهم تليفزيونات كتيرة علشان يتفرجوا عليها غير الوعود بتاعة البلتاجي للغلابة بأنه يوفر لهم فرص عمل بعد كده ومايسيبهمش في الشارع يشحتوا ويتمرمطوا زي الأول كنباويه: ايه هو ناوي يجيب لهم عقود عمل في الخليج ؟ كنباوي: وانتي الصادقة عقود عمل في قطر وتركيا المواليين للإخوان المسلمين دول شوية كدابين ومنافقين منهم لله ربنا يورينا فيهم يوم أسود من قرن الخروب كنباوية: يسمع منك ربنا ياكنباوي وعلشان اريح بالك ماتقلقش الاعتصامات حتتفض حتتفض قبل بدء الدراسة في الجامعات ماهو مش معقول سنه تضيع على ملايين الطلبه علشان خاطر سذاجة وأطماع الإخوان كله تحت السيطرة ياكنباوي استهدي انت بالله وهو حيحلها من عنده كنباوي: فكرك كده ياكنباوية ؟ كنباوية: طبعا ياكنباوي هو ده اللي حيحصل وبكره أفكرك وقول كنباوية قالت كنباوي: نفسي الواد الجديد يتولد ومصر بلا إخوان كنباوية: حيحصل وبإذن الله حولده والدنيا بخير وبكرة تشوف ده وش السعد كنباوي: ياريت ياكنباوية ياريت كنباوية: اطمن وصدق كلامي وحط في بطنك بطيخة صيفي كنباوي: خلاص أنا حخليها على الله واللي بيتكل على ربنا ربنا مابيخذلهوش أبدا كنباوية: ونعم بالله ياكنباوي ونعم بالله !
