بهيه تزور شرعية للمرة الثانية للاطمئنان على ابنتها ومحاولة معرفة ما بداخلها بعد إلقاء بيان عبد الفتاح السيسي الذي طالب فيه الشعب المصري بالنزول إلى ميادين مصر لمؤازرته وتفويضه في مكافحة ومحاربة والتصدي للإرهاب متمثلا في أفعال وجرائم جماعة الإخوان المسلمين. بهية: صباح الخير يا شرعية. شرعية: صباح النور يا بهية، طبعا أنتي مبسوطة النهاردة اكتر من أي يوم فات؟ بهية: بيني وبينك أيوه أنا قلبي انشرح بخطاب السيسي أول مرة أحس من سنين أن البلد دي فيها راجل ما بيخافش ولا بيهاب أي حد حتى الإرهابيين فكرني بجمال عبد الناصر، راجل واثق من نفسه وملو هدومه حازم حكيم عاقل مش متهور رزين عارف هو بيقول إيه وناوي يعمل إيه مش مهزوز زي غيره ولا بيتهته ولا بيتلعثم وبيقعد يشاور بصوابعه وإيديه ويقول لوغرتمات وكلام مصاطب يسلم فمه. شرعية: وانتي راضية يا بهية عن دعوته للمصريين الشرفاء بالنزول للميادين بكرة؟ بهية: طبعا راضية هو مفيش غير الإخوان اللي من حقها تنزل الميادين إذا كنتم أنتم بتنزلوا بحجة الدفاع عن الشرعية والصندوق احنا كمان من حقنا ننزل ندافع عن جيشنا اللي أنصاركم عمالين يقتلوا فيه الجيش اللي حامينا من الأوغاد الخونة خارطة الطريق اللي حطها الجيش لازم تتنفذ ولازم ننزل ونقول إننا مع خارطة الطريق وعدم عودة مرسي وعدم الإفراج عن المقبوض عليهم من جماعة الإخوان المسلمين. شرعية: بس نزولكم معناه الدعوة لحرب أهلية. بهية: إحنا مش نازلين نحاربكم إحنا نازلين بسلمية من غير أسلحه نقول رأينا ونعبر عنه احنا مش زيكم بنشيل سلاح في تظاهراتنا إحنا ناس نعرف ربنا كويس. شرعية: قصدك ايه إحنا مانعرفهوش؟ بهية: اللي على رأسه بطحه يحسس عليها. شرعية: إنتي بتلقحي علينا بالكلام. بهية: اللي يعرف ربنا مايستبيحش دم المسلمين مهما كان على خلاف معاهم وأنتم قتلتم كتير شرعية: واتقتل منا برضه كتير بهية: أنتم فاكرين إنكم حتضربوا وتقتلوا في ظباط وجنود مصر وهمه حيقفوا يتفرجوا عليكم؟ شرعية: لأ يضربونا ويموتونا بهية: على الباغي تدور الدوائر والبادي اظلم شرعية: أنتم كده بتجروا البلد للهلاك بهية: مين ده اللي بيجر البلد للهلاك أنتم اللي عملتم كده انتم اللي عايزين تحكمونا بالعافية وده مش حيحصل ولا يكون ده على جثث المصريين الحكم بالرضا مش بالعافية ولا بالصندوق ملعون أبو الصندوق الصندوق ده آلية لا أكتر ولا أقل آلية اثبتت أنها فاشلة لما المرشح يقدر يشتري الأصوات بالزيت والسكر وشوية فلوس مستغل حاجة الغلابة علشان يكسب اللي إنتي ماتعرفيهوش إذا كان المجلس العسكري قبل كده خاف من تهديد الإخوان لحظة الإعلان عن النتيجة وقرر فوز مرسي رغم تزوير الانتخابات المجلس العسكري ده راح لحاله وماعدش يعود واللي موجود دلوقتي راجل أسد مابيخافش من تهديدات الإخوان وحيعمل اللي يمليه عليه ضميره وحيساند الشعب ضد الظلم والطغيان أنتم اقذر ناس حكمت مصر شرعية: إنتي كده بتغلطي فيا وفي الإخوان بهية: أنتم تستاهلوا الحرق اللي يجر البلد للحرب الأهلية والاقتتال يستاهل أكتر من كده شرعية: ما السيسي عمل نفس الشيء لما دعاكم للنزول. بهية: الراجل زهق الإخوان بيزيفوا الحقايق بيسوقوا حقايق مغلوطة عن طريق وكالة إعلانات اجنبيه بتسوقهم برة نظير مبلغ كبير علشان توضح للغرب أن السيسي منقلب وأن الإخوان غلابة مظلومين مكسورين الجناح مجني عليهم مسالمين طيبين وده زيف وكدب حيستني إيه تاني يستني لما تقلبوا الرأي العام الدولي عليه الراجل لازم يثبت للعالم أنه بيعمل كده بناء على طلب الجماهير المصرية اللي طلب منها إنها تنزل بكره في كل ميادين مصر تقول كلمتها وتفوضه لحماية مصر من الإخوان الإرهابيين وده أبسط حقوقه على المصريين اللي رجع لهم مصر بعدما سرقها الإخوان. شرعية: بكره نشوف عددكم ولا عددنا. بهية: أنتي بتعومي على عوم البلتاجي اللي بيقول إن الفوتو شوب هو اللي لعب في أعداد المتظاهرين يوم 30 يونيو وأنهم كانوا لا يتعدوا بضعة آلاف الراجل ده أهبل يا إما بيستعبط احنا مش زيكم احنا ما بنضحكش على حد احنا بنقول الحقيقة مجردة زي ما هي كاملة مش ناقصة ولا مغلوطة زيكم شرعية: أنتي رجعتي تتخانقي معايا من تاني. بهية: أنا مش بتخانق أنا بوضح لك الأمر مش أكتر ولا أقل. شرعية: فكرك ينفع نبقي صحاب وإخوات وإحنا جوانا الغل ده؟ بهية: بصراحة لأ لأ ويبقي بنضحك على بعض شرعية صباح الخير يا جاري أنت في حالك وأنا في حاللي شرعية: بشوقك واللي يلد عليكي اعمليه ما حدش عارف بكره فيه إيه بهية: يبقي نتكلم بكرة سلام. شرعية: سلام !