تعالِى و أقولِك إبقى تعالِى عندى و أقولِك معلومة و لازم توصلِّك دى حكاية هتبرجل عقلك يمكن حتى تتوهى ف شكلك مش مسئول إيه راح يحصلِّك *********** لو عايزة تعرفى إيه نهضة فكرة عبيطة تايهة و شاردة فى الواقع أبداً مش واردة و مكانها فى الروس الخُردة إبقى تعالى عندى و اقولك ********* لو عايزة جماعة كدابة العتبة تقلبها إمبابة ووشوشهم مليانة كآبة و زمنهم بقى سجن و غابة إبقى تعالى عندى و اقولك *********** حابّة تشوفى رئيس دلدول ؟ المرشد يفتى و يقول هوا ينفذ كدا على طول و تحسى كأنه متوول إبقى تعالى هنا انا أقولك ********** لو عايزة رئيس وزرا عبيط بلده محتاجة لتظبيط ييجى هوا ع الرضعة يزيط و كأنه قاعد فى الغيط إبقى تعالى عندى و اقولك ********** عايزة تشوفى مستشارين؟ قرارات تطلع مش داريين و يقولوا رئيسنا شار مين ؟ فى كهوفنا سابنا نايمين إبقى تعالى عندى و اقولِك ********* لو عايزة تشوفى إعلان كله غباوة و كله جنان لرئيس فى دماغه تعبان قسّمنا لمدنى و خرفان إبقى تعالى عندى اقولِك ********** لو عايزة تشوفى دستور مسلوق فى الليل من غير نور معمول لشعوب ساكنة قبور مرفوض من كل الجمهور إبقى تعالى عندى و اقولك ********* عايزة تشوفى مجلس شورى ؟ ناسه أخرها تلعب كورة؟ أو حتى تمسح سبورة ؟ بيشّرع لبلد مشهورة إبقى تعالى عندى اقولك ********** لو عايزة نائب ملاكى تبقى معانا هيبقى معاكى ضدنا هيقوم يجرى وراكى ع الهايفة راح يستناكى إبقى تعالى عندى و أقولك *********** لو عايزة وزير عدل كبير فى زماننا إتحول لغفير ظبّطنا و جه وقته يطير و اتأسف و طلب تكفير إبقى تعالى عندى و اقولك ********** لو عايزة وزير فظ قبيح قدام أى نتاية يسيح لو كلبة أو كلب دبيح و يهلفط بكلام و يصيح إبقى تعالى عندى و اقولك ******** لو عايزة تشوفى إعلام عايزينه يتلجّم بلجام سعد لميس قنديل بسام كاشفينّا و ده عيب و حرام إبقى تعالى عندى و اقولك ********** لو عايزة تشوفى ثوار يتسحلوا و ينضربوا بنار يتسجنوا و هما الأحرار و يقولوا عليهم كفّار إبقى تعالى عندى و اقولك ********** لو عايزة تشوفى التعديل زوّدنا ع الوكلا وكيل جبنا عميل من بعد عميل شلنا غريب حطينا زميل إبقى تعالى عندى و أقولك ********** لو عايزة وزير م الهفآت أبيض معدوم الكفاءات كان عيل شغال مبيعات و اهو كله بيسد خانات إبقى تعالى عندى و اقولك ********** لو مش عارفة سر بجاتو كنا زمان نحسب خطواته دلوقتى بنحلف بحياته هنعوزه ... طب جيبه وهاته إبقى تعالى عندى و اقولك . ************* كده بزيادة كلامى واصلِّك ؟ و الا كمان عايزانى أقولّك ؟ لو تسألى أنا بردو هدّلك بس انا خايف لاحسن أشلِك و الأيام جاية و هتقولك .