قاعد مشغول بعد ما أخدت مرتب شهر أبريل، إزاى هتكمل من يوم 2 فى الشهر إلى أخره؟ طبعا بتضرب أخماس فى أسداس وبتفكر مين من الأصحاب هتقوم بالسطو عليهم وتطلب منهم سلفة. وتيجى المدام منشكحة ومبسوطة الحمد لله سددنا ديون شهر مارس واتسترت والحمد لله كل شهر وانت طيب وهاها، وتسألك انت زعلان عشان قبضت؟ تحاول تفهمها إنك بقيت تكره اليوم اللى بتبقض فيه. أول حاجة عامل زى نتيجة الثانوية أعصابك بايظة ورايح الشغل جسمك بيترعش سؤالك هاقبض كام الشهر ده. وتفكر ياربى هيكفى ولا زى كل شهر وربنا يكرمك والشهر ده وتظبط فى الخصم. وتقول ياجماعة حد زعلان الكل فى نفس واحد زى الفل. وكل واحد فى سره ياعم ده الواحد شغال شيال يشيل المرتب من الشغل للبقال والإيجار ومصروف العيال. واللى يزود الضغط عندك إن الشهر اللى مقهور فيه ومظبط تمام طلباتهم تزيد حبتين والمدام تجبر بخاطرك وتطبطب عليك، ربنا يخليك ليهم هما ليهم حد غيرك وانت تضحك ضحكة صفرة نص متغاظ. ياستى قولى يارب وتلاقى عيونك من غير ما تحس نازلة دموع زى المطر فى ليالى طوبة. ده انت ليك 6 شهور عايز تشترى بنطلون وقميص وكل شهر تقول اللى بعده . والشهر اللى تنوى عليه يتقصم وسطك فى الخصم. فى اللحظة دى بالذات بتبقى محتاج قوى لحضن أمك وتصرخ وتقول أه يامه وتلاقى المدام تعيط وتخرط البصل وهات يادموع معلهش الله يرحمها والله ارتاحت من العذاب اللى احنا فيه، شد حيلك وخليك جدع بقى شهر يفوت ولاحد يموت. تمسك أعصابك وتطلع الموبايل وتفكر مين اللى عليه الدور الشهر ده، وتفكر يا ترى هيطلع ندل ولا هيسمعنى كلمتين زىى يا ابنى احنا لسه فى أول الشهر لو انت مكانى تعمل إيه؟!
