الحقونى الحقونى.. «فيتو» يا ناس عايزين يشلوني.. علشان قلت الناس بتغنى وف أفراح عايشين ياعيونى قالوا بتكتب مانتش حاسس فين أوجاعهم قلت أنا حاسس بس أنا خايف.. تيجى الشرطة ويعتقلوني قالوا خلاص فيه ثورة يا راجل.. فيه حرية قول أفكارك.. عبر عن مشاكلنا شوية قلت أنا شاعر ليه مشاعر حسه بأهلي بس زمان كان لما باعبر.. ألقى الشرطة قبضوا عليه قالوا اتكلم .. عبر قول.. عن أفكارك مش معقول إحنا بنكتب عن أحلامنا.. عن مستقبل لنا مقبول قلت أنا حاكتب كل كلامى بكل صراحة... قالوا اتفضل قول سمعنا.. خللى كلامك كدا مسئول قلت يا «فيتو» كلامك ليه.. بيفوقنى كل شوية فعلا شعبى المظلوم لازم.. كل ما أقول له حق عليه عمرى ما حاسكت طول ما فى ظالم بين أهالينا حافضل أقول أفكارى يا عالم.. مهما السلطة عملت فيه كلمة حق ولازم أقولها.. وأفضل ثابت من أولها قيمة الكلمة واللى يقولها.. يبقى فى كل حروف تعبيرها لازم تبقى صريحة مريحة تعبر عني.. وما تبقاش الكلمة خديعة.. والناس تقرف من ترتيلها أيه رأيكو فى كلامى قولوا لي.. قلتم إيه؟ ليه سؤال محتاج لإجابة .. جاوبوا عليه إحنا بنكتب.. وانتو بتقروا كل كلامنا.. نفسى فى نقد لواحد منكم.. واحنا كمان نتناقش فيه