التقى بكار وحمزاوى فى حديقة جروبى بشارع عدلى بناء على رغبه حمزاوى وراحا يتبادلا أطراف الحديث كعادتهما ويتناقشا فى حال مصر سياسيا واقتصاديا واجتماعيا. بكار : اشمعنى جروبى وعدلى مش طلعت حرب ؟ حمزاوى : الفرع ده أهدى ومش متداس زى فرع طلعت حرب وحنعرف نتكلم فيه براحتنا وبدون إزعاج أو تطفل من حد لكن الفرع التانى ماكناش حنعرف نقول فيه كلمتين على بعض. بكار : ماشى يا صاحبى أى مكان معاك حلو بقعدتك الحلوه ووشك السمح. حمزاوى : اه لو الجماعة سمعوك دلوقتى كانوا غاروا وقالوا انك بتعاكسنى. بكار : أى جماعة الإخوان ؟ حمزاوى : يا راجل تف من بؤك أنا أقصد المدام. بكار : هى بتغير عليك ؟ حمزاوى ؟ ألست اللى ما تغيرش على جوزها يبقى ما بتحبوش أو واثقة فى نفسها زيادة عن اللزوم وأنا مراتى رغم ثقتها فى نفسها إلا أنها بتغير عليا موت. بكار : نساء الرسول أيضا كانوا بيغيروا عليه. حمزاوى : ما هو كانت جوازاته كتير ليهم حق. بكار : كل جوازاته كانت بدافع إنسانى وفيها مغزى ربانى مش كانت جوازات بغرض أو قصد الشهوه. حمزاوى: طبعا طبعا ما أنا عارف الكلام ده ومقتنع بيه ما تقلقش يا بكار من أفكارى أنا مسلم وموحد بالله وبحب رسول الله. بكار : وأنا واثق من كده ومش قلقان انت، نسان معدنه طيب وأصيل يا حمزاوى وربنا يديم المحبة والمعروف بينا. حمزاوى : يارب يا بكار يارب. بكار : سمعت عن حملة وزارة الزراعة لخصى الكلاب الضالة ؟ حمزاوى : أيوه سمعت بيقولوا انهم بصدد الحملة للقضاء على كلاب الشوارع بطريقة آدمية متحضرة وأنهم حيبطلوا استعمال سم الاستركنين لأنه بيهدد بكارثه بيئية وبيهدد الزبالين والأطفال فى الشوارع والحيوانات الأليفة. بكار: بيقولوا إن الهيئة العامة للخدمات البيطرية التابعة لوزارة الزراعة بتنفذ توصيات منظمة صحة الحيوان العالمى ال 0IE لأن السم ده محرم دوليا من الدول الأوربية وأمريكا. حمزاوى : طيب اشمعنى المتظاهرين كانوا بيلقوا عليهم غازات محرمة دوليا وبيضربوهم بالخرطوش والرصاص الحى هو الكلاب ليها سعر والبنى آدمين لأ ؟ بكار : الكلاب ما بتهددش النظام لكن البنى ادمين بيهددوا الأنظمة يا صاحبى. حمزاوى : على قولك يا بكار الكلاب ما بتطلبش إسقاط النظام ولا رحيل مرسى ولا انتخابات رئاسية مبكرة ولا تعديل الدستور وعزل النائب العام الكلاب بتهوهو بس وفى أحلك الظروف بتعض والعضة ليها علاج لكن كلام ومطالبات الثوار مالهاش عند الأنظمة الفاشية دى والمستبدة غير علاج واحد هو القتل أو الاعتقال. بكار : بلد بتلقى توصيات حقوق الإنسان فى الزبالة وتهتم بتوصيات حقوق الكلاب يعنى نظام بيقدر الكلاب والبنى آدمين لأ. حمزاوى : لأنه منهم أهله وعشيرته. بكار : ضحكتني. الله يحظك كنت محتاج أضحك . حمزاوى : كل الجاتوه اللى قدامك ويلا نقوم الجو برد . بكار : أنا كمان حاسس بلفحة برد حاكل ونقوم بسرعة. حمزاوى : ما شى يا صاحبى أنا خلصت التورته قبل منك أصلى ما بقدرش أقاومها بحبها من وأنا عيل صغير. بكار : بالهنا والشفا يا صاحبى يلا بينا أنا خلصت. حمزاوى : يلا يا بكار.
